Mijëra gra kanë zbritur mëngjesin e sotëm në rrugët e kryqytetit të Filipineve, Manila për të protestuar kundër Presidentit Rodrigo Duterte, i akuzuar si paragjykues ndaj femrave dhe nxitës i pabarazive gjinore.
Protestueset marshuan drejt pallatit presidencial Malacanang duke thirrur parrulla kundër Duertes. Presidenti ka bërë disa herë deklarata tallëse ndaj përdhunimeve dhe vitin e kaluar pranoi se kur ishte adoleshent, kishte prekur në mënyrë të pahijshme shërbyesen e shtëpisë.
“Vetëm nëse nuk rënkon quhet përdhunim”, ka thënë duke qeshur më herët Presidenti.
Këshilltarët presidencialë janë përpjekur ta zbusin situatën duke këmbëngulur se komentet e Duertes në fakt janë shaka dhe nuk duhen marrë seriozisht. Por, liderja e protestës, Joms Salvador, i tha AFP-së se të tilla pohime janë të papranueshme, qoftë edhe nëse vijnë në formën e shakasë.
“Zbatuesit e ligjit nuk i shohin si batuta këto komente, ata i marrin si prononcime në nivel politikash, ndërsa kriminelët nga ana tjetër marrin zemër”, deklaroi Salvador.
Sipas aktivisteve, një grua apo fëmijë përdhunohet çdo orë në Filipine sot, një rritje kjo e numrit të sulmeve në nivelin 153% krahasuar me dekadën përpara se Duterte të zgjidhej President./Opinion.al
