Në Kalanë e Gjirokastrës, skena e Festivalit Folklorik Kombëtar Edicioni i 11, kësaj here ka marrë një vëmendje të veçantë. Së largu shndërrit plot ngjyrë, nga pranë ajo është e gjallë, vallzon me tingujt e muzikës, fryn lehtë me erën e të lejon të shohësh përtej në sfondin madhështor të kësaj kalaje.
Skena është “qendisur” me dorë, fije për fije ashtu siç qendisen kostumet tradicionale të folklorit Shqiptar. Me kilometra fije shumëngjyrëshe, saktesisht rreth 20km, e punuar nga mbi 15 artizanë Shqiptarë për plot 10 ditë.
“Fijet e Folklorit” e quan Skenografia Ina Lisi, e cila ka konceptuar këtë skenografi të lidhur thellësisht me trashëgiminë kulturore. Herë si një tezgjah, një qylym në endje, herë si një detaj i veshjeve tradicionale e herë si telat e një instrumenti muzikor skenografia mbart shumë ngjyrime metaforike. Një tezgjah i madh i folklorit, ku në dukje mbizotëron e kuqja,ngjyra jonë kombëtare por mijëra fije të tjera ngjyrosen me ngjyrat e veshjeve të krahinave të ndryshme. Një gjetje vizuale e cila ka ndryshuar perceptimin për Festivalit Folklorik Kombëtar, Gjirokastër si një event madhështor që nuk i përket vetëm të shkuarër por të tashmes e të ardhmes, një kartolinë për t’u krenuar. Por gjetja më e madhe qëndron në mënyrën se si jepet mesazhi i ruajtjes së dijebërjes së shumë aspekteve të artizanatit, qendisja, thurja, apo luajtja me lahutë.
“Dëshira ime ishte të krijija një skenë e cila nuk ka vetëm funskion vizual, por që mbart një mesazh të fortë”, shprehet skenografja. Ndërkohë një sfidë ishte ndërveprimi me skenografinë ekzistuese që gjendet në atë arenë të hershme të folkut, kupola e festivalit vepër e skenografit/piktorit Ilia Xhokaxhi, kthyer tashmë ne ikonë të festivalit ndër vite.
“Ideja e fijeve ka ardhur gjithnjë duke patur parasysh skenën ekzistuese, unë doja të krijoja një dialog midis dy skulpturave/skenografive,që është njëkohësisht një dialog midis dy kohëve të ndryshme, dy materialeve, dy kooloriteve. Skena ekzistuese shërben si një mbështetje, si një folé për “Fijet e Folkorit”, skena e re fle brenda të vjetrës,por dhe del jashtë saj me shpërthimin dhe karakterin e saj. Mendoj që ky vallëzim midis tyrë është gjithashtu kuptimplot në raport me mardhënien që e reja ka me të kaluarën”, shprehet Ina Lisi .
Për këtë skenografi ka pununuar një ekip i përbërë nga rreth 35 persona, gjithashtu vlen për t’u theksuar se pas një procesi të gjatë përzgjedhje, është ftuar në skuadër edhe një specialiste e strukturave të fijeve, Ines Esnal. Realizimi është kryer nga Kube Studios, një agjensi kreative në Tiranë.
