Botërori ka pesë ditë që ka ulur siparin, por për FIFA-n asgjë nuk ka përfunduar ende dhe tani që të gjithë janë me pushime, për qeverinë botërore të futbollit është kohë bilancesh. “Rusi 2018”, një prej kupave më spektakolare të botës ka thyer shumë rekorde dhe do të mbahet mend gjatë nga spektatorët.
Pritej të ishte Botërori i Mesit dhe i Ronaldos, pasi luanin shansin e fundit, por kjo lojë konfirmoi edhe njëherë se futbolli luhet në skuadër. Ra gjithashtu edhe miti i mbajtjes së topit. FIFA ka përpiluar statistikat më pikante të turneut, nga golat e shënuar, deri te pritjet e portierëve, kilometrat, goditjet dhe gjatësia.
– 519 centimetra ishte gjatësia në total që bënin Luka Modriç (1.72m), Eden Hazard (1.73m) dhe Antuan Grizman, treshja më e shkurtër që ka fituar “Topin e Artë”, “Topin e Argjendtë” dhe “Topin e Bronztë” në Botërorin “Rusi 2018”, që prej Toto Skilaçit, Lotar Mateusit dhe Diego Maradonës, që mezi bënë 512 centimetra mes tyre në Itali 1990.
– 135 vite dhe tre muaj ishte mosha e përbashkët e trajnerit të Uruguait, Oskar Tabarez dhe atij portugez, Fernando Santos, kur u përballën në 1/8-at, dy trajnerët më të vjetër në një ndeshje të Kupës së Botës. Tabarez dhe anglezi Roi Hoxhson bënin 134 vite dhe dy muaj së bashku kur ekipet e tyre u përballën në Brazil 2014.
– 72.5 kilometra është distanca e përshkuar nga Ivan Perisiç gjatë turneut, më e gjata nga çdo lojtar tjetër në Rusi. Ksavi Hernandez (80 km) dhe Tomas Myler (84 km) ishin rekordmenët e Afrikë e Jugut 2010 dhe Brazil 2014.
– 48 vite kishin kaluar nga hera e fundit që kur një skuadër kishte përmbysur një diasavantazh prej dy golash në një ndeshje me eliminim direkt në Kupën e Botës. E bëri Belgjika ndaj Japonisë 3-2. Për herë të fundit e kishte bërë Gjermania Perëndimore, e cila mposhti 3-2 Anglinë në Meksikë 1970, pavarësisht se atyre iu desh koha shtesë për t’ia dalë.
– 40 vite kanë kaluar nga finalja e fundit e një Botërori pa asnjë lojtar nga klubet e Bajernit të Mynihut apo Interit të Milanos. Rekordmenët gjermanë e ruajtën statusin e tyre me aktivizimin e Korentë Tolisosë për Francën kundër Kroacisë, ndërsa për zikaltrit startuan Marselo Brozoviç dhe Ivan Perisiç (Kroacia).
– 21 orë e dhjetë minuta është koha në total e Lionel Mesit dhe Kristiano Ronaldos pa shënuar në fazën me eliminim direkt të një Botërori. Argjentinasi dhe portugezi kanë bërë respektivisht 8 dhe 6 ndeshje në këtë fazë.
– 18 ndeshje kishin kaluar për skuadrat aziatike pa mposhtur ato amerikanojugore në një Botëror, derisa Japonia e prishi mallkimin duke fituar 2-1 ndaj Kolumbisë.
– 14.3 ishte përqindja e pritjeve të David De Geas në Botëror (më e ulëta në Rusi 2018), i cili ishte edhe favoriti përpara turneut për të fituar çmimin e “Dorezës së Artë”. Portieri 27-vjeçar i Spanjës bëri vetëm një pritje dhe pësoi 6 gola në katër ndeshje. Danezi Kasper Shmajkëll shpëtoi 91.3 për qind të goditjeve që iu bënë portës së tij (21 nga 23), më shumë se çdo portier tjetër, i cili luajti më shumë se një ndeshje.
– 12 autogola u regjistruan në “Rusi 2018”, dyfishi i rekordit të mëparshëm (6), i vendosur në Francë 1998. Marokeni Aziz Buhaduz vendosi rekordin e autogolit më të vonë (minuta e 95-të kundër Iranit); Sergei Ignjasheviç, pak përpara se të mbushte 39 vjeç, u bë futbollisti më i vjetër që shënon një autogol në Botëror, ndërsa Mario Manxukiç u bë lojtari i parë që shënon një autogol në finale.
– 11 goditje është ajo çka qendërmbrojtësi i Anglisë, Herri Meguajër regjistroi në Rusi, më shumë sesa sulmuesi i Brazilit, Gabriel Zhezus (10), Luka Modriç (10), Gylfi Sigurdson (10), Rahim Sterling (10), Robert Levandovski (9), Falkao (8), Kilië Mbape (8), Pol Pogba (8), Serxho Aguero (6) dhe Dele Ali (5). Nejmar është lojtari që bëri më shumë goditje (27), i ndjekur nga Ivan Perisiç dhe Filipe Kutinjo (22).
– 10 lojtarë belgë shënuan në “Rusi 2018”, duke barazuar rekordin e numrit më të madh të shënuesve për një kombëtare që prej Botërorit 1982 dhe 2006 (Franca dhe Italia).
– 7 Kupa Bote radhazi kanë përfunduar me eliminimin e Meksikës në fazën e 1/8-ave. Në 7 orë e gjysmë lojë kundër Brazilit në këtë kompeticion, Meksika nuk ka shënuar kurrë dhe ka pësuar 13 gola.
– 5 adoleshentë kanë shënuar më shumë se një gol në një ndeshje të Kupës së Botës, ndërsa Kilië Mbape u bë i pari që prej Pelesë 60 vite më parë që arrin të shënojë dy gola në një ndeshje të Kupës së Botës me eliminim direkt (4-3 kundër Argjentinës në 1/8-at). 17- vjeçari Pele shënonte tripletë në gjysmëfinalen kundër Francës në 1958 dhe dopietë kundër Suedisë në finale.
– 4 penallti priti Danijel Subashiç në Rusi, duke u bërë portieri i tretë që ndal kaq 11-metërsha pas Harald Shumakerit të Gjermanisë Perëndimore dhe argjentinasit Serxho Gojkoçea. Kroacia, e cila luajti përtej 90 minutave kundër Danimarkës, Rusisë dhe Anglisë, u bë skuadra e dytë që shkon në kohën shtesë në tri ndeshje radhazi në kompeticion pas Anglisë në 1990.
