Shqipëria e ka fituar 2-1 ndeshjen e parë kualifikuese të “Rusia 2018”, ndaj Maqedonisë, por kjo nuk i ka shërbyer të ngjisë ndonjë vend në renditjen mujore të FIFA-s. Madje, nuk i ka mjaftuar as për të ruajtur vendin e 37-të, që kishte për gushtin 2016.
Qeveria botërore e futbollit ka publikuar sot klasifikimin e shtatorit 2016, në të cilën kuqezinjtë e De Biazit kanë humbur tri pozicione. Pra, tashmë e shohin veten në vendin e 40-të. Kjo gjë vjen si rezultat i humbjes në tavolinë i miqësores së luajtur me Luksemburgun, para finaleve të “Euro 2016”, ku Ergys Kaçe u aktivizua në shkelje të rregullores, sepse ishte ndëshkuar me karton të kuq në sfidën pararendëse.
