Policia e Fierit ka vënë në pranga pronarin e një fabrike të përpunimit të vajit, pasi ditën e premte një punonjës i kësaj fabrike ka rënë nga skela teksa punonte.
I dëmtuari, shtetasi me iniciale T. C., ndodhet në spital në kujdesin e mjekëve, ndërsa rezulton se punonte i pasiguruar.
Pas ngjarjes është arrestuar pronari i fabrikës, 62-vjeçari Bajram Dine për veprat penale “Shkelja e rregullave të mbrojtjes në punë” dhe “Punësimi i paligjshëm”.
Njoftimi i policisë
Specialistët e Seksionit për Hetimin e krimeve në Komisariatin e Policisë Fier, në vijim të veprimeve të kryera në lidhje me ngjarjen e ndodhur në një fabrikë për përpunimin e vajit, arrestuan shtetasin B. D., 62 vjeç, banues në Fier, për veprat penale “Shkelja e rregullave të mbrojtjes në punë” dhe “Punësimi i paligjshëm”.
62-vjeçari (pronari I fabrikës), u arrestua sepse gjatë procesit të punës në fabrikën e tij, për përpunimin e vajit, në Fier, më datë 08.02.2024, rreth orës 13:40, ra nga skela shtetasi T. C., 65 vjeç, i cili nga verifikimet rezultoi se ka qenë punonjës i pasiguruar.
I dëmtuari vijon të jetë në kujdesin e mjekëve.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
