Gazetari Blendi Fevziu ndodhet në një prej zonave “më të nxehta” të globit, në kufirin mes Jordanisë dhe Sirisë.
Nëpërmjet një videoje, Fevziu tregon situatën aktuale atje.
Ai shprehet se ka një numër të madh emigrantësh, gra fëmijë dhe pleq të cilët kanë kaluar kufirin e Jordanisë për të kaluar në Siri.
Mes tyre ai takoi dhe dy emigrantë nga Suedia.
“Ky është kufiri mes Jordanisë dhe Sirisë. Në fakt ne kemi hyrë brenda territorit sirian. Kemi kaluar check-point-in e parë atë të pasaportave. Në fakt deri tani nuk na kanë kërkuar ndonjë gjë të madhe. Në ato portat atje, që është dogana, hyhet për në Siri. Nga kjo pjesë e kufirit e deri në Damask është 1 orë e 15 minuta, diku 110 kilometra, por është e gjitha autostradë.
Ndërkohë gjëja që të bën më shumë përshtypje në kufirin jordanez është hyrja e një numri shumë të madh emigrantësh, gra, fëmijë e pleq që po kthehen në Siri. Unë pyeta autoritetet nëse janë refugjatët që kanë qëndruar në Jordani, por më thonë që vijnë nga e gjithë bota. Të paktën dy nga ata që unë fola vinin nga Suedia, njëri më tha që kam njohur dhe shqiptarë në Suedi. Kjo është rruga që të çon në qytetin më të diskutuar të të gjithë globit, për arsye se nuk dihet se çfarë realisht ndodh në Damask dhe kush është pushteti real atje. Nga kufiri siriano- jordanez”, tha Fevziu.
Kujtojmë se regjimi 24-vjeçar i Bashar al-Assad mori fund Dhjetorin e kaluar. Pas kësaj banorët e Damaskut dolën për të festuar rrugëve pasi rebelët shpallën në televizionin shtetëror, mbërritjen në kryeqytetin e Sirisë. Rebelët mësynë në pallatin e diktatorit dhe e hapën atë për publikun, ndërsa Assad dhe familja e tij u arratisën në Moskë.
Pas këtij momenti historik, fuqitë botërore janë zotuar se do të punojnë për stabilitet në Siri dhe rajonin përreth./tvklan
