Gazetari Blendi Fevziu ka dalë në transmetim këtë të mërkurë në një mënyrë krejt ndryshe. Për herë të parë, ai ka drejtuar një emision online, i detyruar nga zhvillimet e fundit në vend dhe vendimi i DASH për të shpallur non grata ish-kryeministrin Berisha.
Në pamundësi për të qenë në studio pasi ndodhej jashtë vendit, Fevziu ka hyrë online në transmetim, ndërsa ka njoftuar se nesër ai do të jetë në Tiranë për të patur një emision live.
Ndërkohë të ftuar në studio janë gazetari Baton Haxhiu, Preç Zogaj dhe ish-Ambasadori Agim Nesho.
Kësaj here nuk po ju flas ekzaktësisht nga studio e emisionit Opinion për arsye të një zhvillimi të fundit, një zhvillim që si shumicën e rasteve janë problematike por sjellin një risi në transmetimet dhe metodat moderne të komunikimit. Sot paradite ne kemi regjistruar një emision i cili përshtatej me zhvillimet midis Izraelit dhe Palestinës. Pas kësaj unë jam nisur për një udhëtim pune për të sjellë një emision në ditët e ardhshme në emisionin Opinion, por në momentin që mbërrita në një vend të huaj, pra jo në Shqipëri, erdhi lajmi i vendimit të Sekretarin amerikan të Shtetit, Blinken, për të ndaluar hyrjen në SHBA të ish-Presidentit dhe ish-Kryeministrit Sali Berisha dhe familjarëve të tij. Unë vendosa ta ndërpres këtë udhëtim dhe nesër të jem në transmetim në një emision të gjerë për këtë çështje, por nuk mund ta humbnim as sot aktualitetin. Pandemia na mësoi që shumë emisione mund të bëhen dhe online, kështu që unë po flas sot nga një qytet europian, ndërkohë që në studion e emisionit Opinion ndodhen 3 të ftuarit e mi për të ndërtuar një emision risi”, u shpreh Blendi Fevziu.
Ndërsa ka qenë duke drejtuar këtë emision aspak të zakontë, Fevziu i ka kërkuar gazetarit Haxhiu ta zëvendësojë në studio, në rast se linja e tij mund të shkëputet./Opinion.al
