Dashuria për skuadrën e tij të futbollit, tradhtoi një italian, i cili fshihej në shtetin grek pasi ishte shpallur në kërkim nga autoritetet italiane.
Policia paraushtarake e Karabinierëve me bazë në Napoli tha se Vincenzo La Porta, i cili ishte në listën e 100 të arratisurve më të rrezikshëm të Italisë, u pa në një foto të tifozëve në një restorant në Korfuz, duke festuar pasi skuadra e tij e zemrës fitoi kampionatin e Serisë A.
Policia në Itali kishte monitoruar aktivitetin e La Porta prej muajsh, duke pritur që ai të bënte një lëvizje të rreme që do t’u jepte atyre informacione për vendndodhjen e tij.
Hetuesit e kanë pikasur mafiozin italian mes fansave dhe u nisën drejt ishullit grek për ta vënë në pranga.
Ata nuk specifikuan se kur u arrestua, por thanë se oficerët e bllokuan atë duke ecur në një rrugë të Korfuzit me një motoçikletë.
La Porta, i cili mendohet se ka lidhje me sindikatën Camorra me bazë në Napoli, është dënuar në mungesë për evazion fiskal dhe mashtrim, tha policia.
Sipas pronarit të një restoranti tjetër në ishull, La Porta kishte punuar atje si ndihmës kuzhinier për muajin e fundit.
Policia në Korfuz tha se ai doli përpara gjykatës të shtunën dhe u urdhërua të mbahej në burg derisa një panel i gjykatësve të gjykatës së apelit të vendosë mbi kërkesën për ekstradim./Opinion.al
