“Një fermer që mjel një lopë te shpia po të mos shkojë të paguajë 60 mijë lekë të marrë një numër NIPT-i, s’mundet me ua shit baxhove qumështin”. Kështu u shpreh një fermer gjatë takimit me liderin demokrat Lulzim Basha në fshatin Gruemirë në Malësinë e Madhe.
Ndërsa një tjetër shrehet: “Subvencionohen nga shteti tre vetë që kanë mbledh sherebelën e gjithë Malësisë së Madhe, e marrin me 150 mijë dollarë e nuk jepet asnjë lek një fermeri”.
Banor: Tri vjet tuj na rrejt në tana format; do uli energjinë elektrike, nga ana tjetër e çon 25 lekë/kilovat energjisë elektrike.
Banor: S’kena as tokë, as nuk mund të mbajmë lopë. Puna është mbyll komplet. Me ça të jetojmë na? Shkoj me marrë një certifikatë, unë s’kam tokë, e më thotë: “Ke me pagu 5 mijë lekë/dynym”.
Basha pasi dëgjoi ankesat e banorëve dhe fermerëve të kësaj zone është shrepur se nuk është zgjidhje kredia kur bujqësia jo vetëm është në vend numëro por po bën hapa mbrapa. “Zgjidhja për fshatin, zgjidhja për fermat, zgjidhja për fermerët është subvencioni. Nuk ka zgjidhje tjetër, se përndryshe nuk e bënte Europa”, vijoi Basha.
“Subvencionet në vitin tonë të parë do të jetë 100 milionë euro dhe nuk do të shkojnë tek grumbulluesit, do të shkojë drejtpërdrejtë tek fermeri, pa NIPT, pa burokraci. E vetmja gjë që do të matet do të jetë është prodhimi, kaq prodhim ke kaq subvencion meriton, do të marrësh subvencionin”, premtoi lideri i PD-së.
Ndërsa gjatë takimit me drejtues të strukturave të PD në Malësi të Madhe, zoti Basha përcolli mesazhin e bashkimit. “Në qoftë se dikush mungon dhe i thotë vetes demokrat, që është gati për të ndarë kontributin e tij apo të saj, është detyra jonë ta thërrasim e ti themi që të kemi pritur. E djeshmja është e djeshmja, ajo çfarë ka rëndësi është e sotmja dhe e nesërmja”, tha ai, duke patur parasysh edhe përplasjet e forta që ka pasur në PD e Shkodrës.
“Në këtë betejë nuk mund, nuk duhet e nuk do të mungojë asnjë demokrat, asnjë burrë apo grua që kërkon largimin e Edi Ramës, ata do të jenë pjesë e kësaj familje, ata do të gjejnë hapësirën e tyre në këtë familje. Askush nuk duhet të ndihet as i paragjykuar, as i mënjanuar, as i përjashtuar”, tha ai, duke çuar një mesazh të drejpërdrejtë tek ata që njihen si mbështetës të Topallit.
Gjatë kësaj bisede, një anëtar, Ramadan Lika, është shprehur: “Unë nuk dhashë kontributin tim në zgjedhjet e vitit 2015 për kreun e Bashkisë dhe për këtë sot u kërkoj ndjesë të gjithëve. Unë jam i gatshëm që sot të japë kontributin tim të pastër. Do të bashkëpunojmë fuqishëm, bashkë me ju derë më derë për të arritur atë fitore që realisht e presin të gjithë”.
