Në një intervistë që kanë dhënë së bashku Birce Akalay (ASLI) dhe Ibrahim Çelikkol (FERHAT) kanë folur rreth dashurisë bardhë e zi të personazheve të tyre. Çfarë ndodh kur bashkohen këto dy ngjyra të ndryshme? Kur bashkohen dy njerëz të ndryshëm? Sa mund ta shndërrojë dashuria një njeri?
Jeni një nga çiftet më të zjarrtë të ekranit. A njiheshit më parë ju të dy?
Birce Akalay: Nuk do të thosha të zjarrtë, por të përputhshëm më saktë. Për të nxjerrë klipin e filmit kemi kërcyer tango. Tangoja është kërcimi që kërkon përputhshmërinë më të madhe në gjithë botën. Edhe pse nuk e njihnim aspak njëri-tjetrin, me ndihmën e koreografëve tanë, Erdal dhe Nora, arritëm të nxirrnim një klip të bukur. Nuk e them këtë sepse Ibrahim është partneri im në film, por ai është vërtet shumë i përshtatshëm për rolin dhe shumë i talentuar. Shpresoj që të festojmë shumë arritje së bashku.
Çfarë mund të thoni rreth njëri-tjetrit?
Ibrahim Çelikkol: Birce ka shumë energji, ka një zemër të bardhë, nuk ka ego, argëtohemi shumë bashkë. Kemi shumë energji dhe në ekran përshtatemi shumë mirë së bashku. Nuk e paskam kuptuar më parë se sa shumë vlerë paska Birce për mua! (qesh)
Birce Akalay: Ibrahimin po e njoh këtë periudhë. Tani për tani mund të them se është shumë i përkujdesur, i sinqertë, punon fort, i gjallë, i jep shumë rëndësi të gjithë ekipit dhe njerëzve të dashur, një njeri që më bën të qesh, një mik i dashur.
Ç’mendim keni ju për mesazhin që po tenton të përcjellë kjo telenovelë “Dashuria mund të pastrojë gjithë ligësitë”?
Birce Akalay: Ka shumë rëndësi lloji i ligësisë. Pak a shumë si gënjeshtra e zezë apo e bardhë, kështu është edhe ligësia… ka disa ligësi që as dashuria nuk i pastron dot, ndërsa disa të tjera i pastron shumë mirë.
Ibrahim Çelikkol: Dashuria nis me ekzaltim të madh duke mos menduar fare për ligësitë që kanë ndodhur në të shkuarën, duke i mohuar ato. E shkuara edhe mund të pastrohet, por duhet një premtim se e ardhmja do të jetë e bardhë, duhet të sigurohet një vijimësi.
Sipas jush, çfarë fuqie ka dashuria? Si mund ta tregoni ju dashurinë?
Ibrahim Çelikkol: Po të kthehemi pas në histori prej dashurisë ka nisur lufta, janë shkatërruar shtete. Kaq fuqi të madhe ka dashuria.
Birce Akalay: Dashuria nuk mund të përshkruhet si forcë. Dashuria është naive. Ndihemi të fuqishëm vetëm sepse emocionet janë shumë të forta dhe duke pasur dashurinë ndihemi si pronarë të gjithçkaje. Nuk do ta quaja dashurinë si një forcë fizike. Është bukur të jetosh dashurinë, njeriu bëhet më i thellë. Nuk do të më pëlqente ta mendoja dashurinë në ndonjë formë tjetër. Është një luftë e fortë. Unë jam e dashuruar me ekzistencën time dhe kjo lloj dashurie është më e vyera.
Po të provojmë të ndryshojmë vendet, a mund të bëhet e bardha e zezë?
Ibrahim Çelikkol: Po the fjalën dashuri ka vetëm bereqet, lulëzim, bukuri, riprodhim, ngjyra… Ndonjëherë është e lodhshme, por nuk duhet humbur kurrë ekzaltimi.
Birce Akalay: Po, mund ta bëjë edhe këtë. Kur dy njerëz bëhen së bashku ata marrin dhe japin te njëri-tjetri. Dy njerëz po aq të ndryshëm sa e bardha dhe e zeza mund të dashurohen dhe me kalimin e kohës kjo dashuri e tyre mund të mbushet me ngjyrë. Mjafton që këto ngjyra të reja të jenë në sfondin e një dashurie të vërtetë. Nëse nuk ka dashuri ky ndryshim do të jetë i përkohshëm dhe në fund secili do të rikthehet në ngjyrën e tij të mëparshme.
Po ju sa të bardhë dhe sa të zinj jeni?
Birce Akalay: Jam një miksim i të dyjave. Ka disa çështje ku ose jam e bardhë ose jam e zezë dhe nuk ka asgjë tjetër në mes, por shumicën e herëve jam një gri. Jam harmonike. Ndonjëherë mund të ndryshoj aq shpejt ngjyrë sa s’ua pret mendja.
Ibrahim Çelikkol: Dikur isha më i prerë, njësoj si e zeza me të bardhën. Por me kalimin e viteve njeriu mëson nga eksperiencat e jetës. Fillon të përqafosh grinë.
Birce Akalay, a keni përjetuar edhe ju një histori të tillë dashurie që duket sikur të pastron nga mëkatet e të shkuarës?
Po sigurisht, pse ju jo?
Le të themi që nuk e kam pasur atë shans…
Atëherë po ta shpjegoj kështu, dashuria është si ilaç. Unë jam e dashuruar me ekzistencën. Zgjohem çdo ditë duke u ndjerë mirënjohëse që jam gjallë, mundohem të lë pas çdo gjë nga e shkuara dhe të eci e pastër në të ardhmen. Le të jetojmë të sotshmen, sepse mbase nuk do ta kemi një të nesërme. Duhet të jetosh gjithmonë me dashuri në zemër.
Ju kemi parë që shpesh në rrjete sociale jepni mesazhe të mëdha rreth problemeve sociale, a mendoni se keni fuqi për të ndryshuar botën?
Përpiqem ta përdor profilin tim për të ngritur çështje që pak preken në media. Është interesante se si njerëz që nuk i ke takuar kurrë ballë për ballë preken nga fjalët e tua dhe mendojnë njësoj si ti. Nuk nguroj të ndaj mendimin tim për çështje të ndryshme. Vetë televizioni është mënyra më e mirë për t’i bërë njerëzit të ndërgjegjësohen.
Çfarë mendimi keni për pozitat e femrave në shoqëri?
Jam shumë e inatosur. Mallkoj në sallonin e shtëpisë sa herë lexoj lajme për dhunimin e grave dhe të moshuarave. Çdo ditë dëgjojmë lajme të tilla. Nuk e kuptoj ç’po ndodh me njerëzit. Ka humbur humanizmi dhe kjo është pjesa që më tremb më shumë.
