Nënkryetarja e Kuvendit, Ermonela Felaj ka zbuluar paktin e arritur dje në zyrën e kryetares së Kuvendit Lindita Nikolla, mes Gazment Bardhit dhe Bledi Çuçit.
Sipas Felajt dy kryetarët e grupeve parlamentare kanë rënë dakord që kur kërkohet fjala për procedurë, ta vendosin ata të dy se cilët deputetë do të flasin në mënyrë që debati për procedure të mos zgjasë pa mbarim.
Vetë Bardhi nuk e mohoi paktin e arritur një ditë më parë.
Debati:
Felaj: Dje kryetarja e Kuvendit ka zhvilluar një takim me kryetarët e grupeve kryesore parlamentare dhe ka pasur një dakordësi që të mos abuzohet me çështjet për kërkimin e procedurës.
Rregullorja përcakton formimin e grupeve parlamentare. Çdo grup ka kryetar grupi dhe jo rastësisht kryetarja e kuvendit këshillohet me kryetarët e grupeve në mënyrë që qëndrimet e anëtarëve e grupeve të ndryshme parlamentare të mund të njehsohen dhe të përcillen në sallë nëpërmjet kryetarit të grupit. Mbi këtë bazë ka ndodhur edhe marrëveshja e djeshme dhe çdo kolegë që nuk do respektojë kërkesën kur kërkohet fjala për procedurë, do ta ndërpres.
Sula, Noka dhe Dogjani kanë kërkuar fjalën, kujt do t’ia jepni fjalën? Kjo është dakordësia që keni vendosur dje mes kryetarëve të grupeve parlamentare kështu që unë duhet ta pyes zotin Bardhi.
Bardhi: Në përputhje me rregulloren e Kuvendit, të tre kolegët që kanë kërkuar fjalën do të duhet të marrin fjalën për procedurë meqenëse e vendos unë.
