Nënkryetarja e shumicës parlamentare, Ermonela Felaj, e cila drejtoi seancën e sotme parlamentare i ka sjellë në vëmendje Sekretariatit për Etikën procedurat për përjashtimin nga seanca të deputetëve të cilët edhe pse ndaj tyre është marrë masë përjashtimore me 10 ditë, vazhduan të qëndrojnë dhe të pengojnë zhvillimin e seancës.
Referuar ligjit, Felaj ka thënë se ndaj deputetit demokrat Edmond Spaho, duhet që afati i masës përjashtimore duhet të dyfishohet, pra nga 10 ditë në 20 ditë.
Po ashtu, Felaj i ka tërhequr vëmendjen dhe 2 deputeteve demokrate, Elda Hotit dhe Sorina Kotit duke i paralajmëruar se nëse vazhdojnë dhe bllokojnë foltoren, do të përjashtohen nga seanca parlamentare.
Ermonela Felaj: Dua t’i sjell në vëmendje Sekretariatit për Etikën procedurat për zbatimin e paragrafit të tretë të nenit 65/1 për Edmond Spahon. Në këtë paragraf thuhet se në rast se deputeti ndaj të cilit është marrë masa për përjashtimin nga mbledhjet e seancës plenare deri në 10 ditë dhe ai sërish refuzon që të dalë nga salla, masa sërish dyfishohet. Afati i masës dyfishohet.
Ndërkohë i tërheq vërejtje Elda Hotit dhe nëse vazhdon që të qëndrojë në foltore, në bazë të nenit 64/2, i heq të drejtën e fjalës dhe në bazë të nenit 65 për vijimin e sjelljes, kërkoj përjashtimin e saj nga seanca plenare.
I jap vërejtje Sorina Kotit se sipas nenit 63 vijues të rregullores, meqënëse Koti vazhdon të mbajë të zaptuar foltoren, i jap vërejtje dhe nëse sërish vazhdon i heq të drejtën e fjalës dhe nëse sërish vazhdon, kërkoj përjashtimin e saj nga çdo mbledhje e komisioneve parlamentare dhe seancat.
