TIRANË- Ministrja e Arsimit, Lindita Nikolla pas deklaratës së Kryeministrit Edi Rama për futjen e fesë në shkollë ka sqaruar se bëhet fjalë për një projekt pilot që do të aplikohet në vitin akademik 2016-2017 në vetëm 10 shkolla.
Lënda e re do të quhet “Historia e besimeve fetare” dhe do të mësohet në shkollat 9vjeçare dhe të mesme. “ Fillimisht projekti do të zbatohet në 10 shkolla pilot, në klasat e gjashta dhe në vitin e parë në gjimnaz”, sqaroi ajo në Komisionin e Arsimit. Sakaq Nikolla ka nxituar të thotë se nuk bëhet fjalë për predikim, por për kulturë fetare. Sipas saj, lënda e re do jepet nga mësues të sociologjisë dhe jo nga teolog.
Debati për fenë në shkolla u hap nga Edi Rama dy ditë më parë kur tha se kemi një projekt për futjen e fesë në shkolla. “Ky projekt konsiston jo në cënimin e laicitetit, por në forcimin e themeleve të kulturës laike, e cila është e dobët dhe e pafuqishme të përballet me format e ekstremizmit të dhunshëm”, deklaroi Rama.
Sipas kreut të ekzekutivit, shkolla publike duhet të jetë një hapsirë njohesë jo vëtëm për shkencat, por edhe për fenë. Në këtë kontekst, Rama bëri të ditur se projekti do të fillojë me disa shkolla, ku programi do të udhëhiqet nga mësues të trajnuar jashtë vendit.
“Do të fillojmë me një numër shkollash në zona urbane e rurale dhe për herë të parë nxënësit do të nxiten nga mësues të trajnuar enkas brenda dhe jashtë vendit të përvejtësojnë elementët e të folurit, premisat e dialogut, hapat e parë të të argumentuarit pa pasione, pa hatërmbetje, pa paragjykime, por duke zhvilluar sensin e përkatësisë falë dhe jo në pësim të dallimeve fetare”, nënvizoi Rama.
