FBI-ja thotë se sulmi në San Bernardino të Kalifornisë po hetohet si akt terrorist.
Gruaja pakistaneze, e cila së bashku me bashkëshortin e saj, akuzohen për masakrën në San Bernardino, ku u vranë 14 njerëz të mërkurën, i kishte shprehur besnikërinë e saj udhëheqësit të Shtetit Islamik, sipas zyrtarëve amerikanë.
Tafsheen Malik, 27 vjeçare nga Pakistani dhe bashkëshorti i saj, i lindur në Shtetet e Bashkuara, Syed Rizwan Farook, 28 vjeç, u vranë gjatë një shkëmbimi zjarri me policinë, disa orë pas masakrës në një qendër rajonale shëndetësore, ku po zhvillohej një festë me rastin e fundvitit.
Sipas autoriteteve amerikane, Tafsheen Malik, me origjinë pakistaneze, por që jetonte në Arabinë Saudite, ku u martua me Syed Rizwan Farookun, kishte vënë një mesazh në Facebook, që i referohej Abu Bakr al-Bagdatit, emiri i Shtetit të vetëshpallur Islamik. Sipas gazetës Uashington Post, një zyrtar i Facebook-ut e konfirmoi natyrën e mesazhit. Teksti konkret i mesazhit dhe në çfarë mënyre ajo kishte shprehur besnikërinë, nuk është bërë ende ditur. Ndërsa gazeta tjetër Nju Jork Times njofton se nuk ka të dhëna që Shteti Islamik të ketë drejtuar sulmin.
Sipas policisë çifti kishte një arsenal të madh municioni dhe eksplozivi në shtëpi, ç’ka lë të kuptosh se ata mund të ishin duke bërë plane për sulme të tjera.
David Bowdich, ndihmës drejtor i zyrës së FBI-së në Los Anxhelos, tha se zyrtarët kanë prova se çifti kishte bërë planifikim të gjatë para kryerjes së sulmit.
Sipas zotit Bowdich FBI-ja po analizon telefonët e tyre celularë, që u gjetën të shkatërruar në vendin e krimit dhe kanë gjetur “lidhje telefonike”, me persona të tjerë, që paraqesisn interes për autoritetet.
Farooku, shtetas amerikan i lindur në shtetin Illinoi, nga prindër pakistanezë, punonte si inspektor për qendrën shëndetësore që ai dhe bashkëshortja e tij sulmuan të mërkurën.
Ndërsa sulmi duket i frymëzuar nga Shteti Islamik, tha një zyrtar, nuk ka prova se si u drejtua nga ISIS. /VOA/
