Zëvendëskryeministri i Kinës, Liu He, do të nënshkruajë pjesën e parë të marrëveshjes tregtare me Shtetet e Bashkuara, gjatë javës së ardhshme në Uashington.
Marrëveshja e arritur muajin e kaluar pritet të ulë tarifat dhe të rrisë blerjet kineze të energjisë dhe mallrave të prodhuara në SHBA, ndërsa adreson edhe disa mosmarrëveshje mbi pronësinë intelektuale.
Ministria e Tregtisë e Kinës tha se Liu He, i cili është kreu i ekipit negociator për bisedimet tregtare me SHBA-në do të qëndrojë në Uashington nga data 13 deri më 15 janar.
Edhe Presidenti amerikan, Donald Trump, e konfirmoi një gjë të tillë më 31 dhjetor kur tha se marrëveshja me Kinën, e quajtur “Faza e parë”, do të nënshkruhet më 15 janar në Shtëpinë e Bardhë.
Trump gjithashtu tha se ai do të nënshkruajë marrëveshjen me përfaqësuesit e nivelit më të lartë të Kinës, dhe se më vonë do të udhëtojë në Pekin për të filluar bisedimet për fazën tjetër të marrëveshjes.
Kujtojmë se Shtetet e Bashkuara filluan një luftë tregtare kundër Pekinit, një vit e gjysmë më parë, pasi e akuzuan për praktika të padrejta të tregtisë, të tilla si vjedhja e pronës intelektuale amerikane dhe subvencionet shtetërore të cilat i përfitojnë kompanitë kineze.
