Prokuroria ngre akuza ndaj një tjetër zyrtari të lartë Tatimesh. Pas drejtorit të Tatimeve në Tiranë, Androkli Kokli, radhën e ka drejtori i Tatimeve në Shkodër. Sot është urdhëruar ndalimi i Hysen Hysajt. Ai dyshohet se ka favorizuar nipin e tij, biznesmen. Urdhëri i ndalimit u zbatua nga ana e forcave të Policisë Vendore, Shkodër.
Nga hetimi i Prokurorisë së Shkodrës, rezulton se drejtori Hysaj ka kredituar në mënyrë të kundërligjshme vlerën e Tatimit mbi Vlerën e Shtuar (TVSH) në shumën mbi 10 milionë lekë të reja, për subjektin tregtar “H…”shpk.
Në bazë të veprimeve proceduriale, rezulton se shoqëria “H…” shpk, me administrator shtetasin M.H,është djali i motrës së drejtorit rajonal të Tatimeve Shkodër. Nipi i drejtorit të Tatimeve kishte humbur të drejtën e rimbursimit të TVSH-së. Në bazë të legjislacionit fiskal, kompanitë që importojnë mallra nga jashtë për efekt të biznesit, duhet të paguajnë detyrimet doganore para se të përfshihen në skemën e rimbursimit të TVSH-së. Në rastin konkret, shoqëria “H…”shpk nuk e ka shlyer detyrimin doganor për disa blerje në vitin 2012 dhe ndërkohë ka bërë kërkesë për rimbursimin e Tatimit mbi Vlerën e Shtuar.
“Nga administrata tatimore nuk është kryer asnjë verifikim për kërkesën e subjektit, si edhe nuk është ushtruar kontroll mbi aktivitetin e tij. Po kështu, subjekti “H…”shpk nuk është shpallur debitor nga administrata tatimore për borxhin doganor, detyrim ky që lidhet me verifikimin për rimbursimin e TVSH-së”, thuhet në njoftimin e prokurorisë.
Nga ana e Prokurorisë së Shkodrës janë krijuar dyshime të arsyeshme se daja, drejtorTatimesh ka favorizuar subjektin tregtar, duke i rimbursuar në mënyrë të kundërligjshme vlerën e TVSH-së, në shifrën mbi 10 milionë lekë të reja.
Në vijim të hetimeve, Prokuroria e Shkodrës ka urdhëruar ndalimin e shtetasit Hysen Hysaj, i dyshuar për veprën penale të “Shpërdorimit të detyrës”.
