Faturat e kripura të ujit, Prokuroria nis hetimet ndaj Ujësjellësit

Prokuroria e Tiranës regjistron procedim penal me dy akuza në lidhje me skandalin e mbifaturimeve në Ujësjellësin e Tiranës. “Ndërhyrje e paligjshme në rrjetet kompjuterike” dhe “shpërdorim detyre” janë veprat penale për të cilat Prokuroria, pas verifikimit vetëm disaditor, ka vendosur të regjistrojë procedim penal.
Burimet nga prokuroria kanë bërë me dije se hetimi ka nisur mbi bazën e materialit referues të përcjellë nga policia për disa raste mbifaturimesh muajt e fundit. Prokuroria ka bashkuar në këtë procedim edhe një padi të bërë nga vetë Ujësjellësi i kryeqytetit për “ndërhyrje të paligjshme në sistemet kompjuterike”.
Burimet e Prokurorisë thanë se “pas konstatimit se objekti i kallëzimit dhe ai i materialeve të tjera referuese ishte i njëjtë, është vendosur bashkimi i të gjitha shkresave në një procedim penal”. Pas kësaj faze të ezauruar tashmë nga Prokuroria, grupi i hetimit ka nisur veprimet me qëllim zbardhjen e mekanizmit të anomalisë së ndodhur me sistemin informatik të Ujësjellësit të Tiranës.
Paraprakisht mësohet se është hedhur poshtë mundësia e “ndërhyrjes nga jashtë” pasi sistemi i faturave të UKT-së nuk ka ekspozim online apo në rrjete publike. Për këtë arsye, dyshimet paraprake janë se ndërhyrja mund të jetë kryer “nga brenda” UKT-së për arsye që ende nuk janë të qarta.
HETIMI
Gjatë muajit shkurt 2016, në Prokurorinë e Tiranës kanë mbërritur dy materiale referuese në lidhje me çështjen e mbifaturimeve nga Ujësjellësi i Tiranës. Kjo ngjarje u bë shkak edhe për protesta në zonën e Kombinatit, si dhe për reagimin e ministrit të Brendshëm, Saimir Tahiri. Bashkia e Tiranës, pas denoncimit të rasteve publikisht, mori masat e saj duke shkarkuar nga detyra drejtorin e UKT-së, Neritan Gjojdeshi.
Pas vendimit për nisjen e hetimeve, Prokuroria ka nxjerrë një urdhër sekuestrimi për pajisjet e sistemit informatik të faturave të UKT-së. Po kështu, grupi i hetimit ka hartuar një listë me personat që do të merren në pyetje në lidhje me çështjen. “Hetimi do të vazhdojë paralelisht, me verifikimin dhe ekspertimin e pajisjeve kompjuterike dhe marrjen në pyetje të punonjësve të UKT”, thanë burimet e Prokurorisë.
Sipas tyre, është marrë informacion edhe për personat e jashtëm që kanë akses në sistemin kompjuterik. Ata janë specialistët e mirëmbajtjes së sistemit, të cilëve u është kërkuar informacion me shkrim në lidhje me atë që ka ndodhur.
Më pas, Prokuroria pritet t’i marrë në pyetje këta specialistë për mundësinë e ndërhyrjes në sistemin kompjuterik të Ujësjellësit. Paraprakisht, Prokuroria bën me dije se UKT ka një fond më vete dhe ka kryer shpenzime vjetore në lidhje me sistemin kompjuterik dhe programin përkatës për sistemin e faturave.
Pjesë e këtij fondi është edhe mirëmbajtja e sigurimi i sistemit nga dëmtimi, manipulimi si dhe krijimi i kushteve./ Panorama