Ish-komandanti i UÇK-së, Fatmir Limaj i njohur si Çeliku është ftuar të enjten për intervistim në Prokurorinë Speciale, raporton “Insajderi” i thirrur në burime të portalit. Ai po hetohet për vrasjen e dy civilëve shqiptarë në rajonin e Malishevës, në vjeshtën e vitit 1998. Përgjegjësinë për vrasjen e këtyre dy shqiptarëve, atë kohë, e kishte marrë Shtabi i Përgjithshëm i Ushtrisë Çlirimtare të Kosovës duke u thirrur “në emër të popullit”.
Prokuroria Speciale, po e heton ish-komandant Çelikun për një rast të ri të krimeve të luftës. Po dyshohet për vrasjen e dy civilëve shqiptarë në rajonin e Malishevës.
Fatmir Limaj, i njohur si komandant Çeliku, dyshohet se ka dorë në ekzekutimin pa gjyq të Ramiz Hoxhës nga Bellanica dhe Selman Binishit nga Banja. Aso kohe Limaj ishte komandant i zonës.
Në këtë cilësi është ftuar që të enjten të merret në pyetje në Prokurorinë Speciale në cilësinë e të dyshuarit.
Insajderi ka mësuar se Limaj do të merret në pyetje sot në ora 16 në Prokurori. Ai është i dyshuari kryesor për këto dy vrasje.
“Është hapur një hetim i ri kundër z. Limaj për krime lufte kundër popullatës civile”, ka thënë burimi i Insajderit.
Prokuroria dhe mbrojtja nuk kanë folur për këtë rast.
“Më kanë pyetur edhe gazetarë tjerë nëse ka një hetim të ri për z. Limaj, por nuk mund të flas”, ka thënë avokati i Fatmir Limajt, Tahir Rrecaj.
Ramiz Hoxha, ishte pushkatuar nga pjesëtarë të Ushtrisë Çlirimtare të Kosovës, më 2 tetor 1998. Atij i ishte prerë edhe koka. Përgjegjësinë për vrasjen e tij e kishte marrë Shtabi i Përgjithshëm i UÇK-së me komunikatën numër 4.
Po atë ditë ishte pushkatuar nga e njëjta skuadër edhe i riu Selman Binishi. Arsyeja pse ishte vrarë, dyshohet se ishte fakti se ai u kishte thënë ushtarëve të maskuar të UÇK-së, se e dinte se po i njihte se kush janë ata. Skuadra, e kishte futur në bagazh të veturës duke e dërguar në një mal dhe duke e pushkatuar së bashku me Ramiz Hoxhën. /Gazeta Express
