Kryetari i Partisë Demokratike, Lulzim Basha ka akuzuar sot qeverinë se po bën fasadë me punën në Qendrën Spitalore Universitare të Tiranës duke thënë se është përgjysmuar kapaciteti i kirurgjisë.
Gjatë komunikimit të tij me qytetarët në Facebook, Basha denoncoi atë që ai e quajti gjendje të rëndë të shëndetësisë.
Kirurgjia e re, projekti më i fundit i inauguruar nga qeveria në QSUT është fasadë sipas Bashës pasi kapaciteti është përgjysmuar por gjithashtu është zgjatur koha e komunikimit midis reparteve të urgjencës çka ka sjellë edhe vdekjen e qytetarëve.
“E kam dëgjuar edhe javën e kaluar nga mjekët e QSUT se në çfarë gjendje katastrofike ndodhet jo vetëm Pediatria, por e gjithë QSUT-ja. Nuk ka gjë që e përmbledh më mirë konceptin e fasadës sesa ajo që u bë në QSUT. Sapo u inaugurua Kirurgjia e re, nga 12 kemi 6 salla, nga 120 kemi 60 shtretër. Po ta shikosh nga kronikat televizive, po, fasada është e bukur, është e lyer bukur. Po të futesh brenda kemi gjysmën e kapacitetit që kishte e vjetra për t’u shërbyer pacientëve, për të mos u futur në detaje të tjera të tmerrshme që kam dëgjuar nga profesionistët sesi mënyra dhe koha e komunikimit nga një repart i urgjencës tek një repart tjetër është zgjatur në krahasim me çfarë ishte. Pra, në qoftë se të duheshin një minutë apo dy minuta për të kaluar nga emergjenca në sallë operacioni, tani duhet të kalosh dy- tre ashensor. Pse?! Për hir të fasadës. Dhe kanë filluar vdekjet e atyre pacientëve, të cilëve mund t’u shpëtohet jeta, në qoftë se thelbi do të kishte prevaluar mbi fasadën. Jo, fasada në këtë rast, kontekstualisht, po vdes njerëz në QSUT”, deklaroi Basha. /Opinion.al
