Izz al-Din al-Haddad, i njohur ndryshe si Abu Suheib, është figura enigmatike që prej disa muajsh drejton Hamasin në Gaza.
I quajtur “Fantazma” për shkak të profilit të ulët, por ndikimit të fortë, ai ka trashëguar komandën pas vrasjes së paraardhësve dhe konsiderohet sot si njeriu që mban frenat e vendimeve strategjike të grupit militant.
55-vjeçari, me origjinë nga Brigadat al-Qassam, ka shërbyer më herët në njësinë e sigurisë al-Majd, e më pas ka drejtuar Brigadën e Gazës duke marrë pjesë në operacione të shumta kundër Izraelit. Inteligjenca perëndimore beson se ai ka qenë një nga koordinatorët kryesorë të sulmit të 7 tetorit 2023 dhe se ka informuar aleatët rajonalë pa zbuluar hollësi.
Pas shpërthimit të luftës, Abu Suheib u bë objektiv kryesor i Izraelit. Ai i ka mbijetuar disa atentateve, ndërsa dy djemtë e tij, Suheib dhe Moaz, janë vrarë, ashtu si dhe disa bashkëpunëtorë të ngushtë.
Izraeli ka vendosur një shpërblim prej 750 mijë dollarësh për këdo që ndihmon në eliminimin e tij. Njihet si figurë e fortë dhe pragmatike, dhe në një intervistë ka deklaruar: “Ka vetëm dy rrugë: një marrëveshje e nderuar, ose të flijohem.”
Një ish-peng izraelit pohon se e ka parë disa herë duke e përshkruar si të qetë. Ndërsa në një takim tjetër, pas vdekjes së djalit të tij, ai thotë se ishte më i errët dhe i ftohtë.
Ai mendohet të ketë fjalën e fundit në negociatat për pengjet, edhe pse struktura e Hamasit është e ndarë mes atyre që ndodhen në Gaza dhe krahut politik në mërgim, ku përfshihen figura si Khaled Meshal, Khalil al-Hayya dhe Zaher Jabarin.
Pavarësisht ofensivës izraelite, Hamas mban ende nën kontroll rreth 20-25 mijë luftëtarë dhe pjesë të mëdha të rrjetit nëntokësor të tuneleve, që shërbejnë për lëvizje, fshehje pengjesh dhe organizimin e sulmeve të befasishme. Deri tani, janë vrarë 444 ushtarë izraelitë.
Ndërkohë, përpjekjet izraelite për të dobësuar Hamasin përmes mbështetjes së klaneve lokale dhe alternativave politike nuk kanë dhënë rezultat të dukshëm.
Nga ana tjetër, aleatët e Hamasit, si Hezbollahu dhe milicitë shiite irakiane, kanë qëndruar pasivë. Edhe Irani, që kishte ndihmuar me trajnime dhe furnizim armësh, ka humbur figura kyçe si Esmail Shakeri, Saed Izadi dhe Benham Shahriyari, të vrarë në sulmet izraelite ndaj komandove të Forcave Quds.
Popullata palestineze mbetet në qendër të tragjedisë, e rrethuar nga uria, bombardimet dhe vdekja në një konflikt që nuk njeh fund.
