Kryebashkiaku i Kuçovës, Kreshnik Hajdari është marrë i pandehur nga SPAK nën akuzën për “falsifikim të formularit të dekriminalizimit”.
Ai u paraqit paraditen e sotme në Prokurorinë e Posaçme, i shoqëruar edhe nga avokati i tij Theodhori Sollaku.
Vendimi i SPAK vjen një ditë pasi Komisioni Qendror i Zgjedhjeve nuk i ndërpreu mandatin Hajdari si kryebashkiaku. Ky i fundit rezulton të jetë dënuar me 4 muaj në Greqi i konvertuar me një gjobë prej 1500 dhrahmi më shumë se 20 vite më parë.
Sipas Celibashit, vepra penale për kalim të paligjshëm të kufirit për të cilën është dënuar kryebashkiaku nuk është një pengesë ligjore për të marrë një funksion publik, si rrjedhojë Kreshnik Hajdari, nuk ka pasur detyrimin për ta deklaruar në formularin e dekriminalizimit.
SPAK e thirri Hajdarin, dy ditë pasi Prokuroria e Përgjithshme, nëpërmjet një shkrese, njoftoi se ai është dënuar në Greqi në vitin 1999, fakt që nuk e ka deklaruar në formularin e vetëdeklarimit.
Sipas Prokurorisë, kryebashkiaku rezulton që më 23 qershor të vitit 1999 është dënuar me vendim të formës së prerë nga Gjykata e Shkallës së parë të Janinës për hyrje të paligjshme në territorin grek pa leje./Opinion.al
