“Efharisto poli file”. Faleminderit shumë në gjuhën greke shkruan gazeta turke Hurriyet në faqen e saj të parë, duke falënderuar Greqinë për solidaritetin e treguar pas tërmetit shkatërrues që vrau më shumë se 40 mijë njerëz.
“Ekipi grek i shpëtimit (EMAK) prej rreth 50 personash, të cilët qëndruan në Turqi për një javë, u mirëpritën në Greqi si heronj”, shkruante Hurriet, duke përshkruar “klimën e solidaritetit, por edhe humanizmin që morën shpëtimtarët” duke u kthyer në atdhe.
Po e njëjta media, citon deklaratën e kreut të Njësisë Speciale Greke të Reagimit ndaj Fatkeqësive të EMAK-ut, Dimitris Roupa, i cili tha: “Ne bëmë gjithçka që do të bënim në vendin tonë, as më shumë e as më pak”.
Ekipet e shpëtimit grekë ndodheshin në Antioki deri të dielën dhe pak orë para përfundimit të punës së tyre, pranuan kërkesën e të afërmve të një 24-vjeçareje të bllokuar për të ndërmarrë një operacion tjetër, në një pallat në Hatay.
Ditët e fundit disa raportime në mediat turke flasin për “solidaritetin e Greqisë” dhe siç shkruante “Jumhuriet”, ministri i Jashtëm turk mirëpriti Nikos Dendias në Adana duke theksuar se “do të bëjnë përpjekje për të zgjidhur mosmarrëveshjet përmes dialogut, ndërsa komenton se “në ditë kaq të vështira shihen fqinjët e mirë”.
Mevlut Çavusoglu, në një takim që pati me homologun e tij izraelit Eli Cohen, po ashtu u shpreh se shpreson që “solidariteti ynë gjatë këtij tërmeti të jetë vendimtar edhe për hapjen e një faqeje të re me Greqinë. Prandaj, si të gjitha vendet e rajonit, ne duhet të vazhdojmë të punojmë për stabilitetin, zhvillimin ekonomik dhe paqen e rajonit tonë”.
