“Faleminderit Don!” shkruante Kryeministri Edi Rama vetëm pak minuta pasi në media u publikua deklarata e ambasadorit Donald Lu për çështjen Tahiri. Kryeministri ka nxituar ta falenderojë duke lënë lënë të kupthet se mesazhet e Uashingtonit ishin në favorin e tij personal ndaj nuk nguroi ta shkruajë emrin e ambasadorit në mënyrë konfidenciale thjesht “Don”.
Dhe për të gjithë ata që nuk “e kuptuan” se çfarë tha ambasadori që në fakt flet shqip, Edi Rama bën sqarimin përkatës: “Ishte një mesazh i qartë për shqiptarët që duan drejtësi, jo gjyqe komuniste për këdo që kanë votuar a paguar me taksat tyre”.
As kahu tjetër politik nuk mbetet mbrapa në këtë aspekt. Lulzim Basha doli përpara gazetareve ku tha se kishte takuar ambasadorin Lu. “Qëndrimi i qeverisë amerikane është i qartë dhe nuk ka nevojë për komentin tim. Ata mbështesin pa rezerva prokurorët dhe gjyqtarët në një hetim të plotë dhe të paanshëm për të zbardhur dhe për të vënë para përgjegjësisë penale të gjithë ata politikanë të përfshirë në krimin e organizuar dhe në trafikun e drogës si dhe dënojnë cdo përpjekje që politikanët të jenë mbi ligjin dhe jashtë ligjit. Pra që imuniteti parlamentar të përdoret për të mbrojtur politikanët e lidhur me krimin dhe drogën”, tha Basha.
Por kjo nuk është hera e parë që politikanët tanë përpiqen ti vendosin deklaratat e ndërkombëtareve secili në interesin e vet, duke dashur të influencojnë opinionin publik.
Në rastin konkret, si zyrtari i lartë i DASH dje dhe ambasadori Lu sot lëshuan mesazhe neutrale. Ata u përpoqën të bëjnë kujdes për të mos i dhënë dorë asnjërës palë, pavarësisht se deklaratat e tyre u keqinterpretuan.
Kështu thelbi i deklaratës së Lu ishte “publiku duhet të dijë të vërtetën për këtë çështje. Nëse është i pafajshëm, njerëzit duhet ta dinë. Nëse është fajtor, ai duhet të përballet me drejtësinë”.
/Opinion.al
