Agron Xhafaj, vëllai i ministrit të Brendshëm Fatmir Xhafaj nuk mund të ekstradohet në Itali, por as nuk vuan dënimin në Shqipëri, edhe pse është provuar se ka qenë në të shkuarën trafikant droge dhe është dënuar në mungesë në të gjitha shkallët e gjyqësorit italian me 7 vite e dy muaj burgim.
Partia Demokratike paraqiti sot me dokumente ndryshimet ligjore që janë bërë nga kryetari i komisionit të ligjeve, sot ministër i Brendshëm Fatmir Xhafaj, vetem e vetëm të shpëtojë nga burgu të vëllanë dhe sigurisht për të mos njollosur karrierën e tij politike. Partia Demokratike e akuzon Xhafën edhe për falsifikime dhe ndryshime të ligjeve të kryera në fshehtësi.
Konkretisht bëhet fjalë për ndryshimin e nenit 491 të Kodit të Procedurës Penale ku është shtuar pika “f”, sipas të cilit: “Nuk mund të jepet ekstradimi kur personi i kërkuar është dënuar në mungesë, me përjashtim të rastit kur shteti kërkues jep garanci për rishikimin e vendimit”.
Ekzaktësisht propozimi është bërë nga Vasilika Hysi në shkresën nr. 3960, datë 28.12.2016. Pra, sipas ligjit në fjalë: “Nëse një shtetas I dënuar në mungesë jashtë territorit shqiptar nuk jep pëlqimin për tu ekstaduar dhe për ta vuajtur dënimin në vendin ku është dënuar, atëherë ai e vuan dënimin në burgjet shqiptare”.
Falsifikime në Kuvend
Në datën 21.03.2017, Kryetari i Komisionit Fatmir Xhafaj, i ka paraqitur seancës plenare Raportin për projektligjin e ndryshuar të Kodit të Procedurës Penale. Në tekstin integral të ndryshimeve që i bashkëlidhej Raportit dhe i dërgohet seancës për votim, ndryshimi në nenin 491 të Kodit të Procedurës Penale, është shkruar një version tjetër, i falsifikuar dhe i ndryshëm nga ai që ishte miratuar dhe që pasqyrohej në Raportin shpjegues të Komisionit.
“Neni 491”
Nuk mund të jepet ekstradimi:
a) për një vepër me karakter politik ose kur rezulton që ai kërkohet për qëllime politike;
b) kur ka arsye të mendohet se personi që kërkohet do t’u nënshtrohet persekutimeve ose diskriminimeve për shkak të racës, fesë, seksit, shtetësisë, gjuhës, bindjeve politike, gjendjes personale a shoqërore ose dënimeve a trajtimeve të egra, çnjerëzore a poshtëruese ose veprimeve që përbëjnë shkelje të një të drejte themelore të njeriut;
ç) kur ka filluar procedimi ose është gjykuar në Shqipëri edhe pse vepra është kryer jashtë shtetit;
d) kur vepra penale nuk parashikohet si e tillë nga legjislacioni shqiptar;
dh) kur për veprën penale është dhënë amnisti nga shteti shqiptar;
e) kur personi i kërkuar është shtetas shqiptar dhe nuk ka marrëveshje që të parashikojë ndryshe;
ë) kur është parashkruar ndjekja penale ose dënimi sipas ligjit të shtetit të kërkuar;
f) kur personi i kërkuar është dënuar në mungesë, me përjashtim të rastit kur shteti kërkues jep garanci për rishikimin e vendimit.
Pra me këto ndryshime ligjore të votura në parlament në Mars 2017, e bën të pamundur ekstradimin e Agron Xhafajt të dënuar me vendim të formës së prerë nga Gjykata e Lartë Italiane për trafik ndërkombëtar droge me 7 vjet e 2 muaj.
Ky version po kështu e bën të pamundur njohjen e vendimit nga drejtësia shqiptare në mënyrë që Agron Xhafaj ta vuajë dënimin e formës së prerë të drejtësisë Italiane në burgjet shqiptare.
Kjo sepse, Gjykata Italiane vetëm në raste krejtësisht përjashtimore jep garanci për rishikimin e dosjes. Në rastin konkret, kërkesa e Agron Xhafajt është rrëzuar nga Gjykata e Kasacionit në Itali, dhe është lënë në fuqi dënimi ekzistues.
Pra duke qenë se Agron Xhafaj nuk rigjykohet më në Itali, nuk do të vuajë as dënimin në Shqipëri sepse është i dënuar në mungesë.
