“Shihemi në Gjyq” u çel kësaj here pa praninë e Eni Çobanit. Moderatori i programit “E Diela Shqiptare” në Tv Klan, Ardit Gjebrea ‘pikasi’ disa detaje që i lanë të kuptonte se diçka po përgatitej.
Pas pak çastesh, Eni Çobani hyri e shoqëruar nga Blerina dhe Dituria, nënë e bijë të cilat i njohëm në seancën e 22 Janarit 2023. Këtë herë, ato erdhën për të ndarë një lajm të gëzueshëm.
Më 22 Janar, Blerina dhe Dituria u përballën në seancën e ndërmjetësimit për atësinë e djalit. Dituria i kërkonte vajzës të largohej nga shtëpia sepse s’kishte mundësi t’i mbante ose ta linte fëmijën në jetimore. Gjithashtu, u tha se Blerina nuk merrte asnjë të ardhur nga ish-bashkëshorti, Fabiani dhe gjatë kohës që qëndronte në familjen e tij, trajtohej keq nga vjehrra dhe nuk i plotësohej asnjë kusht.
Më 26 Shkurt, Fabiani telefonoi gjatë transmetimit të programit dhe pranoi atësinë e fëmijës. Ai gjithashtu tha se do të vinte shumë shpejt në Shqipëri për t’i dhënë mbiemrin si dhe për të shlyer detyrimet morale e financiare. Blerina asokohe u shpreh se fëmija i thoshte “babi” gjyshit të tij, por duket se tashmë çdo gjë është në rrugën e duhur.
Blerina: Unë jam shumë e lumtur se falë ndihmës së zonjës Eni unë sot mora atësinë e djalit. Djali sot njeh babain e vet, u takuam, paguan detyrimin e vet, djali e sheh dhe jam shumë e lumtur për të.
Dituri: Hoqëm një brengë të madhe që unë e mbaja kaq kohë brenda për atë fëmijë dhe unë sot jam e lumtur, jam e çliruar plotësisht që Brajani sot njohu babanë e tij.
Eni Çobani falenderoi publikisht Fabianin, babain e fëmijës i cili u kthye nga Gjermania për t’i dhënë atësinë Brajanit. Ajo gjithashtu shprehu edhe dëshirën se “mund të shohim një mrekulli”, duke iu bashkuar mendimit të Diturisë për çiftin.
Dituri: I shikoja të tre bashkë edhe…
Ardit Gjebrea: Të vinte keq?
Dituri: Po normale se vërtet është djalë i shkëlqyer.
Ardit Gjebrea: Filloi t’i thërrasë babi?
Blerina: Po, e kapte në qafë, e puthte, luanin bashkë.
Dituri: Për atë fëmijë që gëzohej bashkë me babanë e nënën afër, për mua ishte lumturi e madhe.
Eni Çobani: Fabiani na dëgjon.
Ardit Gjebrea: E rëndësishme është që të duhet nëna me babain, unë nuk e di nëse ju duheni akoma Blerina. Ti e do?
Blerina nuk përgjigjet, por qesh.
Dituri: E lehtë që ta takonte pas 3 vitesh nuk ishte, kështu që…
Ardit Gjebrea: Të kishte marrë malli?
Blerina vijon të qeshë.
Eni Çobani: Përderisa qesh, më duket se është “po”.
Ardit Gjebrea: Asaj po i dalin sytë nga vendi nga kënaqësia!/ Tv Klan
