Nëse po kërkoni një arratisje vjeshtore me diell pa fluturimet e gjata, Shqipëria mund të jetë zgjedhja juaj perfekte.Kjo është këshilla që u jep turistëve media britanike expres.Shqipëria vlerësohet si një perlë e nënvlerësuar në Evropën Juglindore e cila është e arritshme në më pak se tre orë me fluturime direkte nga Mbretëria e Bashkuar.
Ky destinacion mahnitës evropian shkruan Express ka plazhe të bukura të cilat edhe në tetor, mund të shijohen ende pasi ka temperatura ditore që arrijnë deri në 21 gradë Celsius, së bashku me gjashtë orë me diell dhe 11 orë dritë dite,. Ndërsa pjesa më e madhe e Evropës ftohet dhe turmat nxitojnë të kthehen në shtëpi, bregdeti jugor i Shqipërisë mbetet jashtëzakonisht i ngrohtë dhe i qetë.
Riviera Shqiptare është e pakrahasueshme, me plazhe të mrekullueshme si Ksamil, me ujërat e tij të kristaltë dhe rërën e bardhë. Qytete si Dhërmi, Jalë dhe Himarë janë ideale për relaks pranë detit pa turma të mëdha.
Berati dhe Gjirokastra janë dy vende të trashëgimisë botërore UNESCO me arkitekturë unike dhe kështjella madhështore. Parku Kombëtar i Butrintit është një tjetër vend magjepsës, ku mund të eksploroni rrënoja greke dhe romake të rrethuara nga natyra.
Nuk lihet pas edhe Tirana .Sipas Express kryeqyteti, ka një atmosferë të gjallë me ndërtesa shumëngjyrëshe, jetë nate dhe vende historike si Sheshi Skënderbej dhe muzetë. Ndërsa për ata që e duan natyrën, Malet e Nemuna në veri ofrojnë mundësi të shkëlqyera për ecje në natyrë dhe pamje mahnitëse.
