“Ne jetojmë në një kohë kur Evropa nuk është më një kontinent paqeje.”
Kështu e nisi fjalimin e tij para ligjvënësve në Parlamentin francez, presidenti ukrainas Volodymyr Zelensky, teksa vijoi duke e quajtur presidentin rus Vladimir Putin një “armik të përbashkët” të vendit të tij dhe Evropës.
Zelensky, i cili u prit me duartrokitje nga deputetët francezë e filloi fjalimin e tij me një “faleminderit” për Francën, për mbështetjen e treguar ndaj Ukrainës, duke iu referuar trupave aleate të Luftës së Dytë Botërore.
“Këto beteja (përfshirë D-Day në Normandi) e sollën Evropën përsëri te njerëzimi. Pa to, nuk do të kishte as Francë, as Ukrainë, as shtete të lira në Evropë”, tha presidenti ukrainas.
Ai më tej deklaroi se pas pushtimit rus të Ukrainës, Putin “e ktheu nazizmin përsëri në Evropë“.
Duke iu referuar thirrjes së Macron që avionët luftarakë “Mirage” t’i jepen Ukrainës, Zelensky tha se “luftëtarët që do të pilotohen nga forcat ukrainase do të tregojnë se Evropa është e fortë dhe e bashkuar nën vlerat e përbashkëta”.
“Shpresoj që luftëtarët që pamë dje në qiellin e Normandisë do të shihen së shpejti në qiejt e Ukrainës”, theksoi ai.
