Spanja është “zhytur” nën një valë të pandërprerë të nxehti, ndërsa temperaturat kanë filluar të rriten drejt asaj që parashikohet të jetë një fundjavë e zjarrtë në të gjithë Evropën Jugore.
Shërbimi i motit në Spanjë tha se termometrat potencialisht mund të arrijnë 45 gradë Celsius në zonat juglindore të Gadishullit Iberik, të cilat janë në alarm për nxehtësi ekstreme. Kjo pikë prej 45 gradë Celsius u arrit të hënën në fshatin Loja afër Granadës në fillim të valës së të nxehtit që po shkakton probleme në mbarë vendin.
Mbi 100 stacione meteorologjike regjistruan temperatura prej të paktën 35 C që në orën 6 të mëngjesit të së mërkurës, sipas meteorologut së agjencisë kombëtare të motit të Spanjës.
Ndërsa pritet një lehtësim në ditët në vijim për Gadishullin Iberik, vendet e tjera evropiane do të djersiten gjatë fundjavës. Në Itali, 10 qytete janë vënë në alarm të nxehtësisë së lartë për të moshuarit dhe popullatat e tjera të cënueshme nga Bolzano në veri, duke u shtrirë në jug deri në Bolonja, Firence dhe Romë.
Temperaturat pritet të arrijnë në 40 C në brendësi të Sardenjës të mërkurën. Temperaturat kanë filluar të rriten edhe në Greqi, ku një valë e të nxehtit parashikohet të arrijë deri në 44 C në disa pjesë të vendit në ditët në vijim.
Autoritetet ndaluan aksesin në rezervatet natyrore dhe pyjet për të reduktuar rrezikun e zjarreve, ndërsa bashkitë po hapnin zona me ajër të kondicionuar në ndërtesat publike që njerëzit të strehoheshin nga nxehtësia. Ministria e Bujqësisë e Greqisë lëshoi kufizime në transportin dhe orët e punës të kafshëve të tilla si kuajt dhe gomarët që ofrojnë udhëtime në zonat turistike gjatë valës së të nxehtit.
Kafshët e punës nuk do të lejohen të punojnë ndërmjet mesditës dhe orës 17:00 në ditët ku temperaturat janë ndërmjet 35-39 C. Në rajonin e Mesdheut pritet që temperaturat të rriten më shpejt se shumë zona të tjera të globit për shkak të ndryshimeve klimatike./Opinion.al
