Banorët e një pallati dhe një vile në Gjirokastër janë evakuuar gjatë natës pas rrezikut që u shfaq për godinat ku banin nga rrëshqitja e tokës.
Rreth mesnatës prefekti i qarkut të Gjirokastrës miratoi vendimin e kryetares së bashkisë për evakuimin e 17 familjeve banorë të pallatit 5-katësh dhe 3 familjeve të një vile pranë pallatit që rrezikohen nga rrëshqitja e dheut.
“Deri në momentin që studimi gjeologjik të vijë pranë Bashkisë së Gjirokastrës, pranë Prefekturës së Qarkut, ne t’i evakuojmë banorët pranë konviktit të Pedagogjikes. Sigurisht që këto janë vendime për të qetësuar qytetarët, në mënyrë që ata të mos jenë të pa orientuar dhe të mos shprehen se nuk ka një vend për t’u strehuar dhe ku të jenë të përkujdesur nga ana jonë”, u shpreh kryebashkiakja e Gjirokastrës, Zamira Rami.
Gjatë natës mjete të bashkisë, policisë, zjarrfikëseve dhe spitalit transportuan për në konviktin e shkollës Pedagogjike të gjithë banorët e mbetur në shtëpi me përjashtim të një familjeje që pritet të largohet sot.
Rreth godinave pritet vendosja e shiritave të sigurisë deri në daljen e vendimit prej shërbimit gjeologjik, ndërsa policia është angazhuar për mbrojtjen e territorit.
Ende Instituti i Gjeologjisë nuk ka dalë me një përfundim se çfarë e shkaktoi çarjen e madhe të tokës në kodrinë.
