Ekipi i Partizanit vazhdon të ketë probleme me pajisjen me viza nga ambasada ruse për dy futbollistët e tij kosovarë, Labinot Ibrahimi dhe Ylber Ramadani, të cilët rrezikojnë të mos luajnë në ndeshjen e turit të tretë të Europa League nga ekipit rus të Krasnodar. Tanimë lajmi për refuzimin e vizave nga autoritetet ruse për pajisjen me vizë hyrëse në Rusi të Ylber Ramadanit dhe Labinot Ibrahimit ka bërë jehonë në mediat serbe, të cilët krenohen me refuzimin e “vëllezërve” rusë ndaj kosovarëve.
Problemi ka gjetur pasqyrim në një pjesë të mirë të mediave të shtetit fqinj, që pa dyshim për ata konsiderohet lajm i mirë, meqenëse ka lidhje me Kosovën. Portali serb “supersport.rs”, shkrimin për çështjen e futbollistëve të Partizanit e hap me këtë titull: “Bravo vëllezër, rusët nuk lejojnë futbollistët nga Kosova që të luajnë në Krasnodar”.
Në këtë portal, por edhe në faqe të tjera, ata i referohen prononcimit të drejtorit të Përgjithshëm të Partizanit, Genc Tomori, dhënë për “Panorama Sport”, ku thuhet se Ambasada Ruse në Shqipëri i ka informuar se nuk mund të japë viza për dy futbollistët me pasaportë kosovare.
Duke ditur që Rusia nuk e njeh Kosovën, mediat fqinje pohojnë se Labinot Ibrahimi nga Prishtina dhe Ylber Ramadani nga Ferizaj, e kanë thuajse të pamundur që të pajisen me vizë nga Ambasada Ruse në Tiranë.
