Do të zhvillohet për herë të parë në Shqipëri, Europiani për 17-vjeçarët. Kështu, UEFA i ka besuar Federatës Shqiptare turneun e rëndësishëm për të rinj, ku do të marrin pjesë tetë kombëtare, mes tyre edhe Shqipëria. Në një postim në rrjetet sociale, presidenti i FSHF, Armand Duka e cilësoi 19 Majin, si ditë historike për futbollin shqiptar.
Kreu i futbollit në vend shkruan se është mundësi unike që Shqipëria të jetë në qendër të vëmendjes evropiane.
“19 Maji shënon një ditë historike për futbollin shqiptar! Për herë të parë në vendin tonë zhvillohet një Kampionat Europian, UEFA European Under-17 Championship Albania 2025. Një mundësi unike për të rinjtë tanë që të tregojnë talentin, për tifozët që të përjetojnë emocione të mëdha dhe për gjithë Shqipërinë që të jetë në qendër të vëmendjes europiane. Mirë se vini Portugalia, Gjermania, Franca, Italia, Anglia, Belgjika dhe Çekia! Le të jetë ky Europian një festë e vërtetë në Tiranë, Durrës, Rrogozhinë dhe Elbasan”, shkruan Duka.
Shqipëria U-17 do të luajë ndeshjen hapëse ndaj Portugalisë këtë të Hënë, në stadiumin “Arena Kombëtare”, duke nisur nga ora 18:00.
