Ka mjaftuar një dygolësh i Griezman Franca eliminon Gjermaninë, duke dalë në finale të “Euro 2016”, ku të dielën në mbrëmje do ta presë Portugalia e Kristiano Ronaldos. Në gjysmëfinalen mes “gjelave” dhe “panterave”, kanë triumfuar organizatorët e këtij Europiani, të cilët kanë fituar 2-0 falë një dygolëshi të sulmuesit më të mirë të turneut, Antuan Griezman, 6 gola. Por jo vetëm kaq. Francezët nuk i mundnin gjermanët në një ndeshje zyrtare që nga finalja për vendin e tretë në Botërorin 1958, e fituar 6-3 në Goteborg të Suedisë. Që nga ajo ditë, kishte festuar gjithnjë Gjermania, por nga sonte, historia ka ndryshuar dhe “gjelat”, kanë thyer tabunë.
Ndeshja u zhvillua në një atmosferë elektrizuese në stadiumin “Velodrome” të Marsejës, impiant i cili ka një kapacitet prej 67,354 vendesh. Gjermania e nis ndeshjen pa praninë e 3 titullarëve: Gomez dhe Khedira të dëmtuar, ndërsa Humel i pezulluar për shkak kartonësh.
Francezët u shfaqen më të rrezikshëm më dhjetë minutat e para. Një aksion i nisur nga krahu i majtë në minutën e 7-të, nxori disi të zbuluar Griezmanin në zonën e rreptësisë, por gjuajtja e tij u devijua nga Nojer. Gjermanët patën një rast të mirë për gol në minutën e 13-të, kur Myler gjuajti në zonën e rreptësisë, por topi u devijua pa rrezikuar kuadratin e Lorisit.
Më pas, Zhirud pati një mundësi të artë për Francën pas një aksioni që nisi pas mesit të fushës, duke kapur në befasi mbrojtjen gjermane, por u bllokua nga Hëvedes në momentin kur ai do të gjuante drejt Nojerit. Por kur dukej se gjyqtari Ricoli do të vërshëllente mbylljen e pjesës së parë, talian pa një prekje të topit me dorë nga Shvajnshtajger gjatë ekzekutimit të një goditjeje këndi, duke dhënë 11-metërsh të dyshimtë në minutën e 45-të.
Griezman nuk e pati të vështirë të shënonte përballë Nojerit, duke i dhënë avantazhin ekipit të tij. Në pjesën e dytë, skuadra e Lëvit është hedhur në sulm, por dukej se ishte një mbrëmje “jo”, sepse Boateng braktis fushën pas një dëmtimi teksa po godiste një top.
Në vend të tij hyn shqiptari Shkodran Mustafi. Në fushë aktivizohet edhe Gëce në vend të Kan, por është sërish skuadra e Deshampit që shënon me Grizeman, falë një këmbënguljeje të Pogbasë nga e majta dhe daljes gabim të Nojerit. Gjithsesi kampionët e botës nuk dorëzohen dhe rrezikojnë dy herë për të shënuar, por tregohen të pasaktë përpara portës.
Kësisoj, Franca del në finale të Europianit 2016 në pa bërë shumë zhurmë, duke qenë vendimtare në ndeshjen më të vështirë të kësaj veprimtarie. Pas kësaj fitoreje, skuadra e Deshampit ka sulmin më të mirë në këtë Europian (13 gola të shënuar). 45% e golave të tyre janë shënuar me kokë (5 nga 13). Golashënuesi më i mirë i kompetacionit është sigurisht Antuan Griezman, me 6 gola të shënuar, por që mund ta thellojë shifrën në finalen ndaj “lusitanëve”.
Ndërkohë që Franca është e pathyeshme në 18 ndeshjet e fundit që ka luajtur në shtëpi mes Europianëve dhe Botërorëve. Disfata e fundit ka ndodhur në “Euro 1960” (0-2 ndaj Çekosllovakisë). Portugalia është e paralajmëruar.
