Shqipëria mori pjesë në kualifikueset e “Euro 1984” në Grupin 6, së bashku me këto kombëtare: Austria, Turqia, Irlanda e Veriut dhe Gjermania Perendimore. Pra, bëhej fjalë për një grup me 5 skuadra, që u ndeshën me njëra-tjetrën sipas sistemit vajtje-kthim. Në përfundim, kuqezinjtë e drejtuar asokohe nga trajneri Shyqyri Rreli, e mbyllën fushatën kualifikuese në vendin e fundit, me vetëm 2 pikë, ndërsa e para doli Gjermania Peërendimore, me 11 pikë, po aq sa Irlanda e Veriut.
Asnjë fitore, dy barazime dhe 6 humbje ishin produkti i kombëtares shqiptare në këtë “stacion” të garimit të vet ndërkombëtar, teksa shënoi 4 gola dhe pësoi 14 të tillë. Një golaverazh mjaft negativ. Dy barazimet u regjistruan në “Qemal Stafa”, 0-0 ndaj Irlandës së Veriut dhe 1-1 ndaj Turqisë. 4 golat kuqezinj në këtë fushatë kualifikuesesh për “Euro 1984” u shënuan nga Targaj (2), Çetiner i Turqisë (aut) dhe Tomori. Më poshtë, në mënyrë tabelare e të përmbledhur mund të njiheni me “rrugëtimin” e kombëtares së Shqipërisë, në atë kohë.
