Idris Korro është drejtuar në emisionin “Stop” në Tv Klan pasi tregon se është njohur me qytetarin nga Berati, Edi Spahiu, të cilit i ka thënë për një debi ndaj OSHEE-së në masën 600 mijë lekë të vjetra. Edi Spahiu ia ka marrë përsipër ta zgjidhë këtë problem kundrejt një pagese prej 170 mijë lekësh të vjetra.
Pak kohë më vonë, Idrisi pa që debia nuk ishte hequr. Nuk mjaftoi ky mashtrim, por Edi Spahiu i mori dhe 500 mijë lekë që t’i rregullonte KEMP-in dhe 100 mijë lekë për rrugën, që do të vinte nga Berati në Tiranë.
Kaloi kohë dhe asgjë nuk po zgjidhej, ndaj denoncuesi kërkoi paratë mbrapsht. Ai kërkoi ta takojë disa herë Edin, por ai ia shtynte me justifikime të ndryshme.
Edi Spahiu: Është në monitorim nja dy-tre ditë edhe do ta kalojë këtë situatë. Andej nga ty, dëgjon?
Qytetari: Ëhë?
Edi Spahiu: Nuk më kanë marrë në telefon. Presim tani, kemi hallin, do të kalojnë këtë bisedën tonë. Flasim të shtunën, mbylle! Mbylle pak, se të hënën marr një përgjigje!
Pas kësaj bisede, qytetari ka tentuar ta telefonojë por nuk del. “Stop” takon të afërmin e tij dhe e vendos në dijeni për situatën.
I afërmi: Unë do pres të vijë Edi. Meqë do vijë Edi, të diskutoj dhe me Edin të ma sqarojë ai si është problemi. Të sqarojë edhe çikë ai pozitën e tij kur të vijë. Tani, kur të mbaroj punën, do të shkoj në shtëpi, në momentin që do të vijë Edi, do të flas, do të marr dhe ty të të kthej një përgjigje. Në rregull!
Më pas ndërhyri gazetarja e “Stop” dhe Idrisi mundi të merrte paratë e tij.
Idris Korro: Kam një lajm të mirë. Unë shkova…Më njoftuan domethënë dhe vajta i mora lekët në Berat te ai zotëria.
Gazetarja: E more të gjithë shumën?
Idris Korro: Po, të gjithë shumën e mora. Ju faleminderit. Shumë, shumë faleminderit juve!
Gazetarja: Na vjen shumë mirë!
Idris Korro: Vetëm ju bëni punë për hallet e popullit.
Gazetarja: Ju urojmë gjithë të mirat!
Idris Korro: Ju faleminderit shumë! Shumë faleminderit!
