Ka mbërritur urdhri ndërkombëtar i arrestit në Interpol Tirana për Klement Balilin, ish-kreu i Transporteve në Sarandë që është në kërkim pasi akuzohet si kreu i një organizate të madhe e trafikut ndërkombëtar të drogës.
Urdhri i arrestit u lëshua dje nga autoritetet greke, të cilat thonë se kanë prova të mjaftueshme që Balili është kreu i kësaj organizate trafikantësh droge.
Urdhërarresti i është dorëzuar Prokurorisë Shqiptare, e cila pritet të lëshojë urdhërarrestin e saj për Balilin i cili është zhdukur pak orë pasi mediat përhapën lajmin se ai ishte në hetim prej kohësh.
Policia e Shtetit shqiptar tashme e ka shpallur në kërkim policor ish-drejtorin e Shërbimit të Transportit Rrugor të Sarandës, Klement Balili.
Shpallja në kërkim është bërë me iniciativën e Policisë, me qëllim shoqërimin e tij, edhe pse ende nuk kishte një urdhër ndalimi.
Nga kontrollet e kryera në sistemin e Policisë Kufitare TIMS, rezulton se Klement Balili nuk ka dalë nga Shqipëria.
Por nuk përjashtohet mundësia që ai të jetë larguar me pasaportë false, apo nga kufiri i gjelbër. Ish-drejtori i Shërbimit të Transportit Rrugor të Sarandës, nga fshati Stjar i Delvinës, është identifikuar si një nga krerët e grupit të trafikut të drogës, të goditur nga policia greke e ajo shqiptare në një operacion të drejtuar nga DEA amerikane dhe Europol.
