I dërguari i posaçëm i SHBA-së për Ballkanin Perëndimor, Gabriel Escobar, dhe i dërguari i posaçëm i BE-së për dialogun Kosovë-Serbi, Miroslav Lajçak, këtë të martë do të zhvillojnë një diskutim në Qendrën Evropiane të Këshillit Atlantik në Ëashington për dialogun Kosovë-Serbi.
Ky takim pritet të mbahet online rreth orës 15:00. Në paralajmërimin e Këshillit Atlantik theksohet se progresi i fundit në normalizimin e marrëdhënieve ndërmjet Serbisë dhe Kosovës përmes dialogut Beograd-Prishtinë të lehtësuar nga BE-ja kërcënohet nga përshkallëzimi i tensioneve në veri të Kosovës.
“Më 14 Qershor, forcat serbe arrestuan tre policë të Kosovës, kështu duke akuzuar njëri-tjetrin për kalime të paligjshme kufitare. Si kundërpërgjigje, Kryeministri i Kosovës Kurti ka ndaluar hyrjen në territor të automjeteve me targa serbe. Më herët, popullsia shumicë serbe në veri të Kosovës bojkotoi zgjedhjet lokale komunale në Prill për shkak të një mosmarrëveshjeje rreth targave të automjeteve, duke rezultuar në fitoren e kandidatëve shqiptarë të Kosovës me vetëm 3.5 për qind pjesëmarrje në votues. Protestat shpërthyen kur katër kryebashkiakë, nën mbrojtjen e posaçme të policisë, hynë në ndërtesat komunale dhe disa ditë më vonë u shkaktuan lëndime trupave paqeruajtëse të NATO-s”, thuhet në paralajmërim.
Gabriel Escobar dhe Miroslav Lajçak do të bashkohen me Këshillin Atlantik për të diskutuar mbi zhvillimet e fundit në rajon, dialogun Prishtinë-Beograd, bashkëpunimin SHBA-BE në rajon rreth asaj se si të sigurohet zbatimi i marrëveshjeve të Ohrit dhe Brukselit./Opinion.al
