Sporti i peshëngritjes në Shqipëri ka prekur fundin. Për ta kuptuar më së miri një gjë të tillë, mjaftuan disa minuta gjatë ditës së sotme ku homazhet për figurën e të paharrueshmit Ymer Pampuri u kthyen në fushëbetejën e radhës mes presidentit të Federatës Shqiptare të Peshëngritjes, Elez Gjoza dhe sportistit Erkand Qerimaj.
Një ditë më parë, presidenti i FSHP-së kishte kritikuar ashpër Qerimajn dhe ky i fundit i ishte përgjigjur po ashpërsisht duke bërë akuza të rënda për mënyrën se si Gjoza administronte Federatën. Para kamerave, Gjoza sot u mundua të evitonte një përplasje tjetër me Qerimajn, por pa shumë sukses siç shihet në dialogun “miqësor” në vijim…
Elez Gjoza
“Unë kam paqe gjithmonë më sportistët. Unë debatoj me ta, por në fund jam absolutisht në krah të sportistëve. Edhe kur debatoj të nesërmen i kam harruar të gjitha ato që kam thënë”.
Erkand Qerimaj
“Në krah të sportistëve… nuk duhet të na sulmosh ne që çojmë flamurin”
Elez Gjoza
“Absolutisht jo”.
Erkand Qerimaj
“As abuzime me njerëz të pashkollë që vihen trajnerë kombëtaresh; as të vish me lekët e sportistëve në aktivitete të bësh turizëm në botë. As shumë e shumë shkelje që të gjithë këta sportistë kanë frikë t’i flasin.
Daniel Godelli
“Jo frikë nuk ka për të folur. Unë ia kam thënë në sy. Nuk kam nevojë as për të folur me mediat as për ndonjë gjë tjetër. Ça ka për t’i thënë, ia kam thënë”.
Erkand Qerimaj
“Ja këtë sportistin e kanë përjashtuar për një SMS”.
