Kreu i Bashkisë së Tiranës, Erjon Veliaj ka pushuar nga puna punonjësin e Policisë Bashkiake, Besmir Karaj, i cili u bë i njohur për shkak të gjobës ndaj Partisë Demokratike.
Reila Bozdo. anëtare e Këshillit Bashkiak të Tiranës thotë se, kjo është një hakmarrje e Veliaj pasi “Karaj pati integritetin dhe kurajon që ta denonconte publikisht se firma e gjobës nuk ishte e tija, se ishte falsifikuar”.
Për këtë veprim, Karaj bëri dhe një kallëzim penal në Prokurori, por prokurori i çështjes nuk ka ndërmarrë asnjë hap për këtë çështje.
“Prej 5 muajsh, prokurori Ardian Dyrmishi, mban të mbyllur në sirtar këtë kallëzim, ka provat dhe faktet e mjaftueshme dhe nuk ndërmerr asnjë veprim ligjor ndonëse mediat raportuan se edhe laboratori shkencor i policisë konfirmoi falsifikimin e firmës nga Bashkia”, tha Bozdo.
“Denoncuesi i krimit, i falsifikimit, Polici Karaj që prej tre vitesh në detyrë nuk kishte asnjë vërejtje apo shkelje, hidhet në rrugë, ndërsa autori i krimit, falsifikatori, Erion Veliaj nuk preket, madje vazhdon të trashë zullumin çdo ditë”, përfundoi ajo.
