Pas mbylljes së procesit të votimeve në gjithë Shqipërinë, Erion Veliaj ndau në Twitter rekordin e tij të radhës përsa i përket votave që ai mori në Tiranë.
Për Veliajn këto zgjedhje konfirmuan mbështetjen e tij në krye të Bashkisë së Tiranës madje edhe me më shumë vota se 4 vite më parë. Atëherë ai u zgjodh kryetar Bashkie me rreth 160 mijë vota nga të cilat 108 mijë ishin të PS dhe të tjerat nga aleatët kryesisht LSI. Sot, sipas asaj që ka ndarë Veliaj në Twitter, në Tiranë kanë votuar 171 mijë votues dhe kjo për të është rekord i ri.
Në fakt procesi i numërimit të votave ende nuk ka nisur dhe duhet të kujtojmë se në Tiranë Veliaj nuk kandidonte i vetëm. Pra 171 mijë votat nuk janë apriori për kandidatin e Partisë Socialiste.
Sipas të dhënave zyrtare të KQZ në Tiranë morën pjesë 171390 votues (25.86%). Këto pritet të ndahen mes Erion Veliajt dhe Arben Skënderit.
Këto zgjedhje vendore janë karakterizuar nga një pjesëmarrje shumë e ulët në votime, 21.6% në rang kombëtar sipas KQZ. /Opinion.al
Veliaj thyen rekordin në Tiranë, nga 160 mijë vota bashkë me LSI më 2015, nxjerr në votime 172 mijë vetë https://t.co/sWILBqT0KD
— Erion Veliaj ?♂️?⚽️?? (@erionveliaj) June 30, 2019
