Kryetari i Partisë Demokratike, Sali Berisha në një konferencë për mediat ka folur për emërimet dhe shkarkimet në bashkinë e Tiranës.
Gjatë fjalës së tij, Berisha tha se emërimi i Anuela Ristanit si kryetarja e komanduar në Bashkinë Tiranë duhej të bëhej nga Këshilli Bashkiak dhe jo nga Edi Rama.
Ndër të tjera, ai deklaroi se Erion Veliaj e ka kthyer qelinë e burgut në zyrë bashkie, pasi nga atje firmos dhe vulos dokumente si të ishte në zyrë.
“Çështja e ditës është seria e fundit e Narcosit, që zhvillohet në godinën e qeverisë, bashkisë Tiranës dhe qelitë e burgut qeveritar në Durrës. Zhvillohet një skenar që as në filma nuk do mund të ishte i tillë. Një skenar me habira, me çudira, të denja për çdo puntatë të Narcosit. Në puntatën e fundit pra, çfarë ndodh? Ndodh që Erion Veliaj ka shndërruar qelinë në zyrën e bashkisë. Erion Veliaj aty firmos dhe vulos sikur të ishte në zyrën e bashkisë. Se si mund të ndodhë kjo e di vetëm regjizori. Sikur të jetë në ‘susam hapu’ apo në urdhër të peshkut.
Esenciale është se ai për arsyet e veta paraqet para shqiptarëve një dokument me firmë ku i delegon firmën një punonjëse të besuar të bashkisë që quhet Sara Goxhaj. Në një kohë kur 5 ditë më parë Edi Rama i kishte besuar firmën e Erion Veliajt një Anuela Ristanit. Zonja Ristani doli dje në një media dhe u betua e stërbetua se ajo nuk është njeriu i Edi Ramës. Unë nuk mund të them asgjë, por pyetje do ti shtroj zonjës Ristani: Nëqoftëse ti, nuk je njeri konfidente e Edi Ramës, si pranon ti urdhërin antikushtetues të Edi Ramës. Se kush do të drejtojë bashkinë ka tagër të plotë të përcaktojë këshilli bashkiak me Kushtetutë.
Dhe në një mënyrë apo një tjetër, kjo e delegimit të firmës është e drejtë personale e atij që beson firmën, se firma nuk i jepet kujtdo. Pra rezulton se zonja Ristani e cila betohet se nuk është konfidente e Edi Ramës, dhe mund të mos jetë se nuk e njoh, por zonja Ristani pranon emërimin e saj antikushtetues në krye të bashkisë nga Edi Rama. Ajo këtë emërim duhet ta kërkonte sipas kushtetutës nga Këshilli Bashkiak”, shprehet Berisha.
