Numri dy i qeverisë, Erion Braçe thotë se votat e pavlefshme që u regjistruan në zgjedhjet lokale 2019 janë shumë dhe, sipas tij, ato janë vota kundër qeverisë.
“Votat e pavlefshme janë shumë dhe duhet të jemi realistë: ato janë vota kundër. Duhen lexuar shumë mirë nga secili prej kandidatëve dhe nga PS-ja për të kuptuar se çfarë nuk ka funksionuar në këtë aspekt. Faktori i parë ka lidhje me qeverisjen; faktori i dytë mund të jetë qeverisja vendore, ka shumë të pakënaqur sidomos në zonat rurale për infrastrukturën; faktori i tretë mund të jenë kandidatët”, u shpreh Braçe në një intervistë televizive.
Sa i përket reagimit të kryebashkiakëve opozitarë se nuk do të lënë zyrat, zëvendës kryeministri thotë se: “Janë deklarata që më ngjajnë si ato që nuk ka zgjedhje në 30 Qershor, që do të bëhej nami. Janë deklarata për të motivuar disa punonjës bashkie që të dalin në protestë me molotov në dorë në 8 korrik. Shteti ligjor do të veprojë për secilin nga personat që shkelin ligjin”. Sipas Braçes, Shqipëria nuk ka më një President në korniza kushtetuese.
48 orë ka zgjatur procesi i numërimit të votave për kryetar bashkie dhe këshillin bashkiak në të gjithë vendin për zgjedhjet lokale të 2019. Partia Socialiste do të drejtojë 60 bashki përvec asaj të Finiqit, ku PS mbështeti kandidatin e partisë së minoritetit grek.
Edhe pse pjesëmarrja në këto zgjedhe ishte më e vogël se ajo e zgjedhjeve parlamentar të 2017, ku 46,75% e personave më të drejtë vote shprehen vullnetin e tyre në kutitë e votimit dhe rezultuan 31.898 vota të pavlefshme, në 30 qershor, numri i votave të pavlefshme ishte më i lartë: Numri i përgjithshëm i votave të pavlefshme për kryetar bashkie është 45.276, ndërsa për këshillat bashkiak është 49.986. / Opinion.al
