Ergys Kaçe, mesfushori i Kombëtares dhe PAOK-ut, është vënë nën urdhrat e trajnerit De Biazi më vonë se shokët e tjerë të skuadrës, por garantoi në konferencën e sotshme për shtyp se është në gjendje të mirë fizike dhe fatmirësisht nuk ka asnjë problem.
Në seancën e djeshme stërvitore Kaçe nuk përfshirë në formacionin e menduar nga De Biazi, por mesfushori pranon pa asnjë lloj polemike vendimin e italianit.
“Trajneri vendos për formacionin. Kur luajmë duhet të ndihmojmë skuadrën. Jemi 23 lojtarë, por vetëm 11 mund të luajnë”.
Kaçe i vlerëson njëlloj kundërshtarët që Shqipëria ka në grup: “Besoj se të tre kundërshtarët janë të mirë. Edhe ne kemi ekip të mirë. Po të luajmë si në eliminatore besoj se mund të bëjmë mirë. Duhet të luajmë në grup”.
Në fund ai foli për zgjedhjen e Shqipërisë, si dhe të ardhmen, për të cilën nuk është se zbuloi ndonjë gje: “Para 3 vitesh zgjodha Shqipërinë dhe jam me fat që Shqipëria hyri në Europian. Jemi të lumtur të gjithë si grup që jemi këtu. Europiani është gjë e madhe për të gjithë jo vetëm për mua”. “E ardhmja? Nuk e di nëse do jem te PAOK apo jo, por të shohim me kalimin e kohës.”
