“Do ta bëjmë vendin tonë një nga 10 ekonomitë më të mëdha në botë”, kështu ka deklaruar presidenti turk Erdoğan gjatë ceremonisë së hapjes së urës Tohma, e ndërtuar mbi liqenin e digës Karakaya.
Lajmi bëhet i ditur nga agjencia Anadolu, që citon presidentin që ka deklaruar ndër të tjera, se në 18 vite, ka ndryshuar pamjen e Turqisë.
“Kur erdhëm në qeveri në krye të prioriteteve tona vendosëm projektet që do të zhvillonin vendin tonë në çdo fushë, në arsim, shëndetësi, transport, energji, banesat publike dhe deri në sport. Të gjitha qytetet tona i kthyem në një kohë të shkurtër si kantierë. Me mbështetjen dhe inkurajimin e popullit tonë në 18 vite kemi ndryshuar pamjen e Turqisë në çdo fushë. Mbi këtë infrastrukturë të fuqishme kemi rritur vazhdimisht objektivat tona. Për ta bërë Turqinë një nga 10 ekonomitë më të mëdha në botë u jemi drejtuar projekteve dhe investimeve më të mëdha”, tha Erdogan./Opinion.al
