Presidenti turk Rexhep Taip Erdogan, me një lëvizje politike surprizuese ka krijuar një parti politike në Gjermani, e cila ka në thelb të programit të saj luftën kundër racizmit anti-musliman.
Sipas mediave të huaja, Aleanca Demokratike për Diversitet dhe Zgjim (DAVA), e cila është aleate e Partisë AK të Erdogan, pritet të marrë pjesë ne zgjedhjet e mëvonëshme të këtij viti.
Ajo do të luftojë për të drejtat e “njerëzve me rrënjë të huaja” dhe do të mbajë një qëndrim kundër “racizmit anti-musliman”, tha Fatih Zingal, një figurë kryesore e DAVA-s që ka lidhje me presidentin turk.
Partia u themelua zyrtarisht më 7 janar ndërsa themelimi i saj ka shkaktuar shqetësim në qarqet politike në Berlin.
“Një degë e Erdoganit që kandidon për zgjedhje këtu është gjëja e fundit që na nevojitet,” tha Cem Özdemir, ministri gjerman i bujqësisë dhe një anëtar i Partisë së Gjelbër, i cili është një nga anëtarët me profil të lartë të komunitetit turk tre milionësh në Gjermani.
Jens Spahn, një figurë e lartë në Kristian Demokratët (CDU) pretendoi se DAVA do të ishte “një parti tjetër ekstremiste në Gjermani”.
Ai akuzoi qeverinë e kancelarit Olaf Scholz se “ia ka bërë të lehtë” atyre nëpërmjet një lehtësimi të fundit të ligjeve në lidhje me shtetësinë e dyfishtë./Opinion.al
