Edhe Italia është përfshirë nga moti i keq sot, ku për pasojë kanë humbur jetën katër persona. Problemet më të mëdha janë shënuar në rajonin qendror dhe atë jugor. Zjarrfikësit kanë bërë 1400 ndërhyrje kryesisht për shkak të erës së fortë, prej të cilave 400 vetëm në rajonin e Lacios.
Në këtë rajon janë shënuar edhe katër të vdekur. Tragjedia e parë ka ndodhur në Frusinate, ku për shkak të erës së fortë është shembur një mur duke i marrë jetën dy personave, ndërsa dy të tjerë janë plagosur. Ndërkohë, në Romë një pemë është rrëzuar sipër një makine, duke i marrë jetën një 45-vjeçari. Viktima tjetër është një djalë 14-vjeç, i cili është rrëzuar nga një lartësi prej 6 metrash serish për shkak të erës së fortë.
Gjithashtu sot në Romë edhe Koloseu ka mbyllur dyert për turistët, ndërsa nesër bashkia e kryeqytetit italian ka njoftuar se do të mbyllen të gjitha parqet publike dhe varrezat./Opinion.al
