Vijojnë hetimet mbi ngjarjen tronditëse të ndodhur në Shënavlash të Durrësit, ku tre fëmijët vranë babain e tyre Hysen Meta dhe e varrosën në kasollen e bagëtive.
Ngjarja ka ende shumë pikëpyetje të cilave nuk iu është dhënë një përgjigje nga autoritetet. Ishte Hygerta Meta apo Hyseni ai që qëlloi në drejtim të babait të tyre me 4 plumba, duke e lënë të vdekur në vend.
Teksa tashmë nga Prokuroria e Durrësit po hetohet një tjetër pistë një konflikt i mundshëm në familje në lidhje me pasurinë. Konkretisht bëhet fjalë për një hapësire rreth 12 dynym tokë që ishte në pronësi të familjes Meta. Prokuroria i ka kërkuar zyrtarisht Kadastrës Shtetërore informacion por ende Kadastra nuk u ka kthyere përgjigje.
Nga hetimet ka rezultuar se përveç konflikteve te tjera, në familjen Meta ka pasur diskutime të forta mes anëtarëve të familjes dhe kryefamiljarit, pasi bashkëshortja e tij dhe fëmijët kanë propozuar që ta shisnin tokën e cila në treg vlen disa qindra mijëra euro, por kryefamiljari nuk ka dashur.
Por, në media po qarkullon edhe një tjetër element që të bën përshtypje në skenën e krimit, sipër gropës së hapur nga fëmijët për të groposur babanë, në murin e kasolles, ishte mbishkrimi ‘Eni milioneri, 1 milion dollarë, milioneri!”, emri shkurt i Hysenit.
