Partia Demokratike është shprehur se një tjetër kryetar bashkie rezulton se është i dënuar më herët. Lajmi është bërë i ditur nga Sekretari i Përgjithshëm i PD, Gazment Bardhi, i cili u shpreh se autoritetet duhet të nisin verifikimin për kreun e bashkisë së Matit.
Gjatë një konference për mediat, Bardhi deklaroi se , Agron Malaj është i dënuar me vendim të formës së prerë për akuzën e armëmbajtjes pa leje. Për këtë arsye, sipas Bardhit, ai nuk duhet të ushtrojë funksione publike në vendin tonë. PD ka thënë se kryebashkiakut të Matit duhet t’i hiqet mandati, pasi është në shkelje të ligjit të dekriminalizimit.
“Sot Partia Demokratike i ka kërkuar zyrtarisht Prokurorisë së Përgjithshme verifikimin e të kaluarës kriminale të Edi Ramës së Matit. Agron Malaj rezulton se ndodhet në kushtet e ndalimit për të kandiduar në një funksion publik. Ai është i dënuar me vendim gjyqësor të formës së prerë për armëmbajtje pa leje, dhe sipas ligjit për dekriminalizimin, i ndalohet kandidimi përjetë në një funksion publik. Ky është rasti i pestë pas atij të Shkodrës, Vorës, vaut të Dejës dhe Mallakastrës, që konfirmon se Edi Rama ka ardhur në pushtet falë mbështetjes së krimit dhe ndan pushtet me krimin. Ky është vendimi i Gjykatës që konfirmon dënimin me vendim gjyqësor të formës së prerë të Agron Malajt, të kandidatit të Edi Ramës për Bashkinë e Matit. Partia Demokratike i kërkon Prokurorisë së Përgjithshme dhe më pas Komisionit Qëndror të Zgjedhjeve të veprojë pa asnjë vonesë me administrimin zyrtar të vendimit të Gjykatës së Matit dhe për heqjen e menjëhershme të mandatit për Kryetarin e Bashkisë së Matit, Agron Malaj. Sot është koha që ligji të veprojë, dhe është koha që Edi Rama të mos fshihet pas Agron Malajt, Qerim Ismailajt, Valdrin Pjetit, Agim Kajmakut apo Mark Babanit por të dalë dhe të marrë përgjegjësi dhe t’u shpjegojë qytetarëve shqiptarë se përse alternativa e tij e vetme është krimi. Përse kandidon në bashkitë bastion të Partisë Demokratike individë me të shkuar kriminale, përse tenton të fusë në politikë individë me të shkuar kriminale”-tha Bardhi.
Kujtojmë se ky është rasti i pestë që PD denoncon pas Valdrin Pjetrit të Shkodrës, Agim Kajmakut të Vorës, Mark Babani të Vaut të Dejës dhe Qerim Ismailaj të Mallakastrës.
Vetëm pak ditë më parë selia blu publikoi denoncimin e kreut të bashkisë së Mallakastrës, Qerim Ismailaj. PD akuzoi dhe publikoi disa dokumente, ku sipas saj, rezulton që kryebashkiaku i Mallakastrës është dënuar nga gjykata greke, dënim të cilin nuk e ka shënuar në formularin e dekriminalizimit.
Ndërkohë, kreu i bashkisë së Vorës Agim Kajmaku, është shpallur në kërkim pasi mbi të rëndojnë tri vepra penale “Shpërdorim detyre”, “Falsifikimi i formularëve” dhe “Ushtrimi i funksioneve pas dhënies fund të detyrës”./ Opinion.al
Kërkesa e PD ndaj Prokurorisë së Përgjithshme
