Policia ka arrestuar një 26-vjeçar, i cili gjatë ditës së djeshme ka ofenduar dhe i ka hequr kapelen efektivit të Rrugores, Xhuliano Spahiu.
Ngjarja ka ndodhur ditën e djeshme rreth orës 12:10 në rrugën “Asim Vokshi”, pranë kryqëzimit të “Don Boskos”, teksa efektivi i Rrugores po menaxhonte trafikun.
Sipas uniformave blu, në momentin që polici ka dhënë sinjal të qartë për ndalimin e mjeteve që vinin nga rruga “Don Bosko” për të reduktuar fluksin e lëvizjes, automjeti i drejtuar nga Skerdi Lozi vijoi lëvizjen.
Punonjësi i policisë raportohet se ka fotografuar mjetin e 26-vjeçarit dhe gjatë këtij momenti ai ka dalë nga makina, duke ofenduar dhe shtyrë efektivin e Rrugores, si edhe i ka hequr kapelen duke ia hedhur në tokë.
“Në Tiranë, më datë 21.10.2024, rreth orës 16:50, u arrestua në flagrancë shtetasi Skerdi Lozi, i datëlindjes 06.12.1998, lindur dhe banues në Tiranë, rruga “4 Dëshmorët”, banesë nr.1/1, i pa dënuar më parë. Arrestimi u krye për veprat penale të “Drejtimi i mjetit në mënyrë të parregullt” (nen ndikimin e lëndëve narkotike) dhe “Kundërshtim i punonjësit të rendit publik”, të parashikuara nga nenet 291 dhe 236 të Kodit Penal.
Rrethanat e ngjarjes:
Më 21.10.2024, rreth orës 12:10, në rrugën “Asim Vokshi”, pranë kryqëzimit të “Don Boskos”, shtetasi Skerdi Lozi duke drejtuar një automjet tip “Benz” me targa AB908ON, nuk respektoi urdhrin e një punonjësi të policisë rrugore për të ndaluar, duke vijuar lëvizjen. Punonjësi i policisë rrugore, Xhuliano Spahiu, i cili po menaxhonte trafikun, kishte dhënë sinjal të qartë për ndalimin e mjeteve që vinin nga rruga “Don Bosko” për të reduktuar fluksin e lëvizjes. Automjeti i drejtuar nga shtetasi Lozi nuk e respektoi këtë sinjal dhe vijoi lëvizjen.
Pas kësaj, punonjësi i policisë e fotografoi mjetin dhe gjatë këtij momenti drejtuesi i automjetit doli nga makina, filloi të ofendonte dhe të shtynte punonjësin e policisë. Ai u neutralizua dhe u shoqërua në Komisariatin e Policisë nr. 3. Gjatë kontrollit, rezultoi se shtetasi Lozi drejtonte mjetin nën ndikimin e substancave narkotike, përkatësisht amfetaminës dhe kokainës.
Ndaj tij u vendosën masa administrative sipas Kodit Rrugor, në vlerë totale prej 38,000 lekë dhe iu zbritën 12 pikë nga leja e drejtimit. Arrestimi u krye në ambientet e paraburgimit të Komisariatit nr. 3, Tiranë”,-njofton policia.
