Një përmbarues i shpallur në kërkim për skandalin e mikrokredive është arrestuar nga policia.
43-vjeçari Alban Kote, me detyrë përmbarues gjyqësor, ishte në kërkim për dosjen e mikrokredive, ku më herët u vunë në hetim 8 persona të tjerë.
Ata kishin blerë kredi të këqija nga një bankë e nivelit të dytë dhe detyronin qytetarët që për t’i shlyer duhet të merrnin kredi të dyta ose të treta.
Në rast se nuk i shlyenin, ata i bllokonin qytetarëve llogaritë bankare, vlera e të cilave arrinte deri në 500 fish të vlerës së kredisë që kishin marrë.
Gjykata kishte caktuar masën e sigurisë “arrest me burg” në mungesë për përmbaruesin gjyqësor Alban Kote i akuzuar për shpërdorim detyre.
“Specialistët e Sektorit për Hetimin e Krimit Ekonomik dhe Financiar ekzekutuan vendimin penal për shtetasin A. K., 43 vjeç, banues në Tiranë, pasi Gjykata e Shkallës së Parë e Juridiksionit të Përgjithshëm Tiranë i ka vendosur masën e sigurimit personal “Arrest në burg” për veprën penale “Shpërdorimi i detyrës”,”-njofton policia.
