Është zbardhur ngjarja e rreth tre muajve më parë e ndodhur në parkimin e një qendre tregtare në Lushnje.
Kujtojmë se në parkim janë shkrumbuar nga flakët tre automjete dhe u dogj pjesërisht magazina e kësaj godine.
Ndërkohë sot bëhet me dije se policia ka arrestuar një 26-vjeçar i identifikuar si Fridman Xhaferraj banues në Lushnje i cili dyshohet të jetë autor i zjarrvënies.
“Specialistët për Hetimin e Krimeve në Komisariatin e Policisë Lushnjë, pas një pune hetimore procedurale në bashkëpunim me Prokurorinë Lushnjë, ndaluan shtetasin F. Xh., 26 vjeç, banues në fshatin Plyg, Lushnjë. Ndalimi i këtij shtetasi u bë pasi është autori i dyshuar për ngjarjen e ndodhur në datë 19.02.2021 në parkimin e një qendre tregëtare në Lushnjë ku u dogjën 3 automjete dhe pjesërisht magazina e kësaj qendre tregtare”, njofton policia.
Bëjmë me dije se ngjarja ka ndodhur në orët e para të mëngjesit të 19 Shkurtit në lagjen “Çlirimi”, ku si pasojë e zjarrit në një makinë tip Benz në pronësi të N.K. u shkrumbuan plotësisht edhe dy automjete të tjera të parkuara pranë tij./Opinion.al
